بھارتی ریاست مہاراشٹر میں ایک بھینس نے غلطی سے سونے کا ’منگل سوتر‘ نگل لیا جسے 2 گھنٹے کی طویل سرجری کے بعد نکال لیا گیا ہے۔
بھارتی میڈیا کے مطابق مہاراشٹر کے ضلع واشیم میں ایک بھینس نے غلطی سے سونے کا مہنگا ’منگل سوتر‘ نگل لیا تھا۔ منگل سوتر کی قیمت قریباً 1.5 لاکھ روپے ہے جس کا وزن 20 گرام سے زیادہ ہے۔
واقعہ یوں ہوا کہ ایک خاتون نے’منگل سوتر‘ کو سویا بین اور مونگ پھلی کے چھلکوں سے بھری پلیٹ میں نہانے سے پہلے رکھا تھا۔ نہانے کے بعد خاتون نے چھلکوں والی پلیٹ بھینس کے سامنے کھانے کے لیے رکھ دی اور گھر کے کام میں مشغول ہوگئی۔ چند گھنٹوں کے بعد اسے احساس ہوا کہ ’منگل سوتر‘ تو بھینس نگلی گئی تھی۔
خاتون نے فوری طور پر اپنے شوہر کو واقعے کی اطلاع دی جس کے بعد جانوروں کے ایک ڈاکٹر سے رابطہ کیا گیا۔ ڈاکٹر نے میٹل ڈیٹیکٹر کا استعمال کیا اور تصدیق کی کہ ’منگل سوتر‘ بھینس کے پیٹ میں ہے۔ اگلے دن بھینس کی 2 گھنٹے طویل سرجری کی گئی اور اس کے پیٹ سے ’منگل سوتر‘ کو کامیابی سے نکال لیا گیا۔ سرجری کے بعد بھینس کے 60 سے 65 ٹانکے لگائے گئے۔
