اسلام آباد ہائیکورٹ نے سابق آرمی چیف جنرل قمر جاوید باجوہ اور سابق ڈی جی آئی ایس آئی جنرل فیض حمید اور دیگر کو نوٹس جاری کر دیے ہیں۔
ریٹائرمنٹ کے بعد قانونی رکاوٹ توڑنے اور مختلف واقعات کو غلط اور من گھڑت طریقے سے بیان کرنے کے الزام کے مقدمہ میں جنرل باجوہ، جنرل فیض حمید اور دیگر کے خلاف ایف آئی اے میں مقدمہ اندراج کی درخواست پر چیف جسٹس عامر فاروق نے جنرل قمر باجوہ، جنرل فیض حمید، صحافی، ایف آئی اے، صحافی جاوید چوہدری، شاہد میتلا، پیمرا اور پریس ایسوسی ایشن آف پاکستان کو بھی نوٹس جاری کر دیے ہیں۔
عدالت نے راولپنڈی کے رہائشی عاطف علی کی درخواست پر سماعت کے تحریری حکم میں کہا ہے کہ درخواست گزار کے مطابق ایف آئی اے کو مقدمہ اندراج کے لیے درخواست کے بعد بار بار استدعا کی گئی۔ پیمرا کو بھی پابندی کی استدعا کی گئی لیکن کوئی کارروائی نہیں کی گئی۔
درخواست گزار کے وکیل نے کہا ایف آئی اے کو حکم دیا جائے کہ جنرل قمر باجوہ، جنرل فیض حمید، صحافی جاوید چوہدری اور شاہد میتلا کے خلاف مقدمہ درج کرکے کارروائی کی جائے۔
راولپنڈی کے رہائشی عاطف علی نے دائر درخواست میں کہا ہے کہ ’غلط اور من گھڑت طریقہ سے مختلف واقعات کو بیان کرکے جنرل باجوہ اور جنرل فیض نے ریٹائرمنٹ کے بعد قانونی و اخلاقی رکاوٹ عبور کی، اس پر وہ سنگین جرم کے مرتکب ٹھہرے ہیں۔ ایف آئی اے مقدمہ درج کرکے سخت ایکشن لے۔
درخواست گزار نے صحافی و کالم نگار جاوید چوہدری اور شاہد میتلا کے ریٹائرڈ جنرل باجوہ سے ہوئی ملاقات کے تناظر میں لکھے گئے مضامین، درخواست کا حصہ بناتے ہوئے کہا ہے کہ جاوید چوہدری اور شاہد میتلا نے محض قارئین کی توجہ (ویورشپ) کے لیے کالمز لکھے جس کا معاشرے پر منفی اثر ہوا۔ میں نے کالمز دیکھے تو حیران رہ گیا کہ کیسے یہ مافیا معاشرے کو پراگندا کر رہا ہے۔ توجہ حاصل کرنے کے لیے صحافت کی آڑ میں ان کالموں سے ریاستی ادارے کی منفی تصویر پیش کی گئی۔
درخواست میں کہا گیا ہے کہ کالموں میں بیان کیے گئے واقعات عوام اور ریاستی اداروں کے درمیان عدم اعتماد پیدا کرنے کی کوشش ہیں۔ آزادی اظہارِ رائے کی آڑ میں مجرمانہ رویہ سامنے آیا ہے۔ اس لیے انداراج مقدمہ کے لیے درخواست دی لیکن ایف آئی اے نے کوئی کارروائی نہیں کی۔ عدالت مقدمہ درج کرنے اور فوری کارروائی کا حکم دے۔
