بارکھان واقعہ پر مشاورت کیلئے قبائلی جرگہ طلب کرلیا گیا ہے۔
نمائندہ وی نیوز کے مطابق بارکھان واقعہ پر مشاورت کیلئے خان آف قلات کے بھائی سینیٹر پرنس آغا عمر احمد زئی نے قبائلی سربراہان کا اجلاس ایوان قلات کوئٹہ میں بلا لیا۔
ترجمان ایوان قلات کے مطابق کوئٹہ اجلاس میں بلوچ، پشتون قبائل کے سربراہان شرکت کریں گے، قبائلی جرگہ میں سانحہ بارکھان سے متعلق قبائلی رسم و رواج کے تحت مشاورت ہو گی۔
یہ بھی پڑھیں : بارکھان واقعہ، پولیس کا صوبائی وزیر عبدالرحمان کھیتران کے گھر پر چھاپہ
دوسری طرف بارکھان میں قتل ہونے والے افراد کے ورثاء کا احتجاج گزشتہ 12 گھنٹوں سے جاری ہے، مظاہرین ریڈ زون کے باہر لاشین رکھ کر احتجاج کر رہے ہیں۔
مظاہرین کا مطالبہ ہے کہ واقعے میں ملوث صوبائی وزیر کے خلاف ایف آئی اے درج کی جائے۔
بارکھان میں قتل ہونے والی خاتون کے شوہر خان محمد مری نے کہا ہے کہ میری اور میرے بچوں کی زندگیوں کو خطرہ ہے،مجھے اور بچوں کو قتل کرنے کی دھمکیاں دی جا رہی ہیں۔
انہوں نے مطالبہ کیا ہے کہ مجھے تحفظ فراہم کیا جائے تو میں اپنے شہداء کی لاشوں کے پاس آ سکوں۔
