انتخابات کی تاریخ دینے کا اختیار الیکشن کمیشن کے پاس ہے، نگراں وزیراعظم

نگراں وزیراعظم پاکستان انوارالحق کاکڑ نے کہا ہے کہ پنجاب اور پختونخوا کے انتخابات میرے وزیراعظم بننے سے پہلے ہی تاخیر کا شکار ہو چکے تھے، آرٹیکل 254 کہتا ہے کہ کوئی کام تاخیر سے ہونے کی وجہ سے غیرقانونی نہیں ہو جاتا۔

لاہور یونیورسٹی آف میڈیکل سائنسز ’لمز‘ کے طلبا وطالبات کے ساتھ خصوصی نشست کے دوران گفتگو کرتے ہوئے انہوں نے کہاکہ انتخابات کی تاریخ دینے کا اختیار الیکشن کمیشن کے پاس ہے۔

انہوں نے کہاکہ نگراں حکومت عام انتخابات کے انعقاد کے لیے الیکشن کمیشن کو وسائل فراہم کرنے کے لیے تیار ہے۔

نگراں وزیراعظم نے کہاکہ پاکستان میں اس وقت عبوری جمہوریت ہے مستحکم جمہوریت نہیں، ہمیں ایک دوسرے کے سیاسی نظریات کا احترام کرنا ہوگا۔

انوارالحق کاکڑ نے طلبا وطالبات سے گفتگو کرتے ہوئے کہاکہ طالبعلمی کا زمانہ انسان کی زندگی کا قیمتی سرمایہ ہوتا ہے، نوجوان ہمارے ملک کا قیمتی سرمایہ ہیں۔

ان کا کہنا تھا کہ درست فیصلے آپ کی ترقی اور کامیابی کے ضامن ہوتے ہیں، تعصبات سے بالا تر ہو کر ہمیں قومی ترقی میں حصہ ڈالنا ہوگا۔

وزیراعظم نے کہاکہ معیار تعلیم کے فروغ میں لمز کا کردار ہے، کوشش ہو گی کہ آئندہ بھی آپ کے ساتھ نشستیں ہوتی رہیں۔

واضح رہے کہ نگراں وزیراعظم انوارالحق کاکڑ آج ہی سرکاری دورے پر لاہور پہنچے ہیں جہاں انہوں نے ’لمز‘ کے طلبا و طالبات کے ساتھ گفتگو کی۔

طلبا و طالبات کی جانب سے وزیراعظم سے مختلف سوالات کیے گئے جن کے وزیراعظم نے مدلل جوابات دیے۔