اینٹی کرپشن ڈیرہ غازی خان نے چیئرمین تحریک انصاف عمران خان کے بہنوئی احد مجید کی ضمانت منسوخ کردی۔
اسپیشل اینٹی کرپشن ڈیرہ غازی خان نے لیہ اراضی اسکینڈل میں چیئرمین پی ٹی آئی عمران خان کی ہمشیرہ ڈاکٹر عظمی کے شوہر احد مجید کی ضمانت منسوخ کر دی تاہم احد مجید موقع سے فرار ہونے میں کامیاب ہو گئے، اینٹی کرپشن اہلکار ملزم کی گرفتاری کے چھاپے مار رہے ہیں۔
ترجمان اینٹی کرپشن کے مطابق محکمہ اینٹی کرپشن پنجاب کو لیہ اراضی اسکینڈل میں بڑی کامیابی حاصل ہوئی ہے، چیرمین پی ٹی آئی عمران خان کے بہنوئی احد مجید کی ضمانت خارج ہوگئی ہے۔
ترجمان اینٹی کرپشن کا کہنا ہے کہ چیئرمین پی ٹی آئی کی بہن عظمیٰ خان اور بہنوئی احد مجید سے لیہ اراضی اسکینڈل میں تحقیقات جاری ہیں، ڈاکٹر عظمی اور ان کے شوہر احد مجید نے عدالت سے ضمانت کروا رکھی تھی۔
ترجمان کے مطابق اینٹی کرپشن کی لیگل ٹیم کی جانب سے آج اسپیشل جج اینٹی کرپشن ڈیرہ غازی خان کو ٹھوس ثبوت فراہم کے گئے، جس پر معزز عدالت نے ملزم احد مجید کی ضمانت خارج کرنے کا فیصلہ سنایا۔
ترجمان اینٹی کرپشن کے مطابق چیئرمین پی ٹی آئی کی بہن ڈاکٹر عظمیٰ اور بہنوئی نے غیر قانونی طور پر لیہ میں زبردستی مالکان سے زمین خریدی، اور غیر قانونی طور پر اثرورسوخ استعمال کرکے زمین کا انتقال بھی کروایا گیا۔
ترجمان کے مطابق ملزمان نے سرکاری ریکارڈ میں جعلسازی کرکے زمین اپنے نام کروائی، جب کہ احد مجید وغیرہ نے کچھ مالکان کو ڈرا دھمکا کر ان سے زمین اپنے نام لکھوائی۔
ترجمان اینٹی کرپشن کا کہنا ہے کہ ملزم احد مجید کی گرفتاری کے لئے چھاپہ مارا گیا لیکن وہ موقع سے فرار ہوگیا۔ جلد احد مجید اور دیگر ملزمان کو گرفتارکر کے قانون کے کٹہرے میں لایا جائے گا۔
