نیشنل ڈیٹا بیس اینڈ رجسٹریشن اتھارٹی (نادرا) نے خیبر پختونخوا میں غیر قانونی افغان شہریوں کی ہنگامی بنیادوں پر رجسٹریشن کا عمل شروع کردیا ہے۔
ترجمان نے بتایا ہے کہ نادرا نے ملک بھر سے 22 موبائل وینز اکٹھی کرکے افغانستان واپس جانے والے شہریوں کی رجسٹریشن کے لیے لنڈی کوتل پہنچا دی ہیں۔
ٹرانزٹ پوائنٹ پر موبائل وین کی سہولت کے ساتھ 20 کاؤنٹرز بھی بنائے جائیں گے جن میں نادرا کے 140 ملازمین بغیر کسی وقفے کے 24 گھنٹے اپنے فرائض سرانجام دیں گے۔
ترجمان نے کہا کہ یکم نومبر سے نادرا نے اپنی یومیہ رجسٹریشن کی گنجائش بڑھا کر 15 ہزار کر دی ہے، نادرا کے سینیئر افسران موقع پر موجود ہیں اور وطن واپس جانے والے افغان شہریوں کی ہر ممکن مدد کی جا رہی ہے۔
انہوں نے کہا کہ نادرا حکام اس بات کو یقینی بنا رہے ہیں کہ خواتین، بزرگوں اور بچوں کو کسی قسم کی مشکلات کا سامنا نہ کرنا پڑے۔
