اسرائیل میں عام شہریوں کا قتلِ عام نہیں کیا گیا، حماس

حماس کے سینئر رہنما موسیٰ ابو مرزوق نے اس بات کو تسلیم کرنے سے انکار کیا ہے کہ ان کے گروپ نے اسرائیل میں عام شہریوں کو ہلاک کیا ہے۔

خبر رساں ادارے ’بی بی سی‘ کے مطابق موسیٰ ابو مرزوق نے کہا ہے کہ حماس کے حملوں سے ’خواتین، بچوں اور عام شہریوں کو استثنیٰ حاصل ہے۔‘ حماس کے رہنما جن کے برطانیہ میں انسداد دہشت گردی کے قواعد و ضوابط کے تحت اثاثے منجمد کیے گئے ہیں، وہ 7 اکتوبر کے بعد سے بی بی سی سے بات کرنے والے سب سے سینئر رکن ہیں۔

واضح رہے کہ اسرائیل نے دعویٰ کیا تھا کہ 7 اکتوبر کے حملوں میں حماس کے ہاتھوں 1400 سے زائد اسرائیلی ہلاک ہوئے ہیں جن میں سے زیادہ تر عام شہری تھے۔

موسیٰ ابو مرزوق نے اسرائیلی یرغمالیوں کے بارے میں بتایا کہ جب اسرائیل غزہ پر بمباری کر رہا تھا تو انہیں رہا نہیں کیا جا سکا۔ گذشتہ ماہ اسرائیل کی کارروائیوں کے آغاز سے اب تک 10 ہزار افراد ہلاک ہو چکے ہیں۔ ابو مرزوق نے کہا کہ ہم یرغمالیوں کو رہا کر دیں گے لیکن پہلے جنگ بندی ضروری ہے۔

ابو مرزوق نے حال ہی میں ماسکو کا دورہ کیا تھا جہاں انہوں نے 7 اکتوبر کو حماس کی جانب سے یرغمال بنائے گئے 8 روسی اسرائیلی شہریوں کے بارے میں بات چیت کی تھی۔ انہوں نے کہا کہ غزہ میں حماس کے ارکان نے 2 روسی خواتین یرغمالیوں کی تلاش کرلیا تھا تاہم اسرائیلی بمباری کی وجہ سے انہیں رہا کرنے میں ناکام رہے۔

انہوں نے کہا کہ وہ یرغمالیوں کو صرف اسی صورت میں رہا کر سکتے ہیں جب اسرائیل جنگ بندی کرے تاکہ ہم انہیں ریڈ کراس کے حوالے کر سکیں۔ حماس کی القسام بریگیڈ کے سربراہ محمد ضیف نے اپنے جنگجوؤں کو حکم دے رکھا ہے کہ کسی عورت، بچے اور کسی بوڑھے کو قتل نہ کیا جائے، ہمارا ہدف صرف اسرائیلی فوجی ہیں۔

حماس کے رہنما نے ہیلمٹ کیمروں سے بنائی گئی ویڈیوز کو مسترد کر دیا جن میں نہتے شہریوں کو ان کی کاروں اور گھروں میں گولیاں مارتے ہوئے دکھایا گیا تھا۔