لیول پلیئنگ فیلڈ ہو یا نہ ہو انتخابات پیپلزپارٹی جیتے گی، بلاول بھٹو

پاکستان پیپلزپارٹی (پی پی پی) کے چیئرمین بلاول بھٹو نے کہا ہے کہ لیول پلیئنگ فیلڈ ہو یا نہ ہو آئندہ عام انتخابات میں ہم کامیابی حاصل کریں گے۔

کراچی میں میڈیا سے گفتگو کرتے ہوئے انہوں نے کہا کہ تاریخ گواہ ہے پیپلزپارٹی کو کبھی بھی لیول پلیئنگ فیلڈ نہیں ملی مگر عوام نے جب جب چاہا تو ہم اقتدار میں آئے۔ میری پارٹی اب کسی سے لیول پلیئنگ فیلڈ کا شکوہ ہی نہ کرے۔

بلاول بھٹو نے کہا کہ آئندہ عام انتخابات کے بعد سندھ کے وزیراعلیٰ کے علاوہ وزیراعظم بھی جیالا ہو گا۔ عوام نے 8 فروری کو جذبے کے ساتھ تیر پر مہر لگانی ہے۔

چیئرمین پیپلزپارٹی نے کہا کہ ملیر اور کراچی سمیت پاکستان بھر کے عوام پیپلزپارٹی کے ساتھ ہیں، ہم اقتدار میں آ کر نوجوانوں کو ہنر مند بنانے کے علاوہ روزگار بھی مہیا کریں گے۔

انہوں نے کہاکہ پیپلزپارٹی اقتدار میں آ کر اس ملک کی قسمت بدل دے گی، ہم حلقہ بندیوں کا عمل مکمل ہونے کے بعد ٹکٹوں کا اعلان ایک ساتھ کریں گے۔

بلاول بھٹو نے کہاکہ کراچی کے ہر ضلع میں کھیلوں کے بہترین میدان بنائیں گے، عوام کے ساتھ جلد انتخابی مہم میں ملاقات ہو گی۔

انہوں نے کہاکہ مسائل صرف سندھ میں نہیں بلکہ دیگر صوبوں میں بھی ہیں، میں دوسروں پر الزامات لگانے کے بجائے مسائل کے حل پر یقین رکھتا ہوں۔