خیبرپختونخوا کے علاقے ٹانک میں دہشتگردوں کے حملے میں ایس ایچ او سمیت 3 اہلکار شہید اور ڈی ایس پی سمیت 3 زخمی ہو گئے ہیں۔
پولیس کے مطابق واقعہ ٹانک کے نواحی علاقے تھانہ ملازئی کی حدود شاہ نور گاؤں میں پیش آیا، جہاں ڈی ایس پی رورل اور ایس ایچ او مغویہ کے مقدمے کی کارروائی کے لیے گئے تھے، اور واپسی پر انہیں حملے کا نشانہ بنایا گیا۔
مزید پڑھیں
پولیس نے بتایا کہ گھات لگائے نامعلوم دہشتگردوں نے پولیس پر اندھا دھند فائرنگ کردی جبکہ پولیس نے بھی جوابی کارروائی کی۔ فائرنگ کا سلسلہ تقریباً 30 منٹ تک جاری رہا جس کے نتیجے میں ایس ایچ او تھانہ شہید مرید اکبر عبدالعلی خان، ہیڈ کانسٹیبل محمد عالم اور کانسٹیبل وہاب گل ایلیٹ فورس جاں بحق ہو گئے۔ جبکہ ڈی ایس پی رورل چن شاہ، اشفاق ایلیٹ فورس، ڈسٹرکٹ پولیس ٹانک کے کانسٹیبل اکرام اور ریاض زخمی ہوئے ہیں۔
وقوعہ کی اطلاع ملتے ہی کیو آر ایف سمیت بھاری پولیس نفری نے موقع پر پہنچ کر علاقے کو گھیرے میں لے کر سرچ آپریشن شروع کردیا ہے جبکہ زخمیوں کوسول اسپتال ٹانک منتقل کر دیا گیا۔
پولیس فورس کے حوصلے بلند ہیں، ریجنل پولیس آفیسر ڈیرہ اسماعیل خان
ریجنل پولیس آفیسر ڈیرہ اسماعیل خان ناصر محمود ستی نے کہا کہ پولیس اور سیکیورٹی فورسز نے دہشتگرد عناصر کے خلاف آپریشن شروع کر دیا ہے اور ان کے ناپاک عزائم کو خاک میں ملا رہے ہیں۔ یہ بزدلانہ حملے اس لیے کیے جا رہے ہیں کہ پولیس کے حوصلے پست ہو جائیں لیکن دہشت گردوں کے چھپ کر بزدلانہ حملوں سے پولیس کے حوصلے پست نہیں ہوں گے۔
انہوں نے کہاکہ پوری پولیس فورس کے حوصلے بلند ہیں اور ہم ڈٹ کر ان سے مقابلہ کر رہے ہیں۔ ان شااللہ جلد دہشتگرد عناصر کو کیفرکردار تک پہنچایا جائے گا۔
