لوگ عمران خان کے ساتھ ہیں ، اس بات سے انکارنہیں کیا جاسکتا، خواجہ آصف

وزیر دفاع اور مسلم لیگ ن کے سینئر رہنما خواجہ آصف کا کہنا ہے کہ اس بات سے انکار نہیں ہے کہ لوگ عمران خان کے ساتھ ہیں لیکن اس کا یہ مطلب نہیں کہ ملک میں عدم استحکام کی صورتحال پیدا کردی جائے ۔

نجی ٹی وی ڈان نیوز سے گفتگو کرتے ہوئے وفاقی وزیر دفاع خواجہ آصف نے کہا کہ عمران خان کے ہمراہ جوڈیشل کمپلیکس آنیوالے افراد مسلح تھے ، یہ لوگ عمران خان کی گرفتاری کی صورت میں کسی بھی حد تک جاسکتے تھے ،ماضی میں بھی سیاسی قیادت عدالتوں میں پیش ہوتی رہی ہے۔

انہوں نے کہا کہ ذوالفقار علی بھٹو کو عدالتوں سے پھانسی کی سزا ہوئی ، میاں نواز شریف 200مرتبہ انہیں عدالتوں میں پیش ہوتے رہے ہیں لیکن کبھی ایسی صورتحال پیدا نہیں ہوئی عمران خان سیاسی مفاد حاصل کرنے کے لیے ملک میں افراتفری چاہتے ہیں۔

وزیر دفاع نے کہا کہ عمران خان جب سے حکومت سے گئے ہیں انہوں نے اداروں کے خلاف محاذ کھولا ہوا ہے پہلے انہوں نے فوج اور جنرل (ر)باجوہ کو تنقید کا نشانہ بنایا اوراب عدلیہ پر حملہ کیا ہے۔