پاکستان کی معروف کاروباری شخصیت ملک ریاض نے 190 ملین پاؤنڈز اسکینڈل کے معاملہ پر سپریم کورٹ کو درخواست دیدی ہے۔
درخواست میں موقف اختیار کیا گیا ہے کہ نیب 190 ملین پاؤنڈز کے معاملہ کی تحقیقات کر رہا ہے، سپریم کورٹ کے ریمارکس یا آبزرویشنز سے نیب کی تحقیقات متاثر ہو سکتی ہیں۔
مزید پڑھیں
درخواست میں کہا گیا ہے کہ نیب سپریم کورٹ کی آبزرویشنز کا تحقیقات میں اثر لے سکتا ہے۔
ملک ریاض نے استدعا کی ہے کہ سپریم کورٹ درخواست کا جائزہ لے کر مناسب حکم جاری کرے۔
واضح رہے کہ سابق وزیراعظم عمران خان کے دور میں برطانیہ کی نیشنل کرائم ایجنسی (این سی اے) نے معروف کاروباری شخصیت ملک ریاض کے ضبط کیے گئے 190 ملین پاؤنڈ ایک تصفیے کے تحت حکومت پاکستان کو منتقل کیے تھے۔
عمران خان نے این سی اے کو اجازت دی تھی کہ یہ رقم براہِ راست سپریم کورٹ آف پاکستان کے اکاؤنٹ میں منتقل کی جائے، سابق وزیراعظم کے اس اقدام کا بظاہرہ فائدہ ملک ریاض کو ہوا ہے کیوں کہ انہیں ایک مقدمہ میں 460 ارب روپے سپریم کورٹ کے اکاؤنٹ میں جمع کرانے کا حکم دیا گیا تھا۔
عمران خان پر الزام ہے کہ انہوں نے اس تصفیے کے بدلے میں ملک ریاض سے مالی فوائد حاصل کیے ہیں جن میں القادریونیورسٹی کے لیے زمین کا معاملہ سر فہرست ہے۔
