مقامی عدالت نے کراچی کے علاقے اورنگی ٹاؤن میں تاجر کے گھر ڈکیتی کے کیس میں گرفتار ڈی ایس پی عمیر طارق بجاری کو عدالتی ریمانڈ پر جیل بھیج دیا جبکہ دیگر 3 ملزمان کو جسمانی ریمانڈ پر پولیس کی تحویل میں دیدیا ہے۔
گرفتار ڈی ایس پی عمیر طارق سمیت 4 ملزمان کو جوڈیشل مجسٹریٹ غربی کی عدالت میں پیش کیا گیا، مجسٹریٹ نے 3 گرفتار ملزمان سے تشدد کی بابت دریافت کیا تو انہوں نے انکار کرتے ہوئے کہا کہ ان پر تشدد نہیں ہوا۔
ملزم محفوظ حسن نے عدالت کو بتایا کہ انہیں ایس ایس پی صاحب نے بھیجا تھا، ڈی ایس پی عمیر بجاری نے کارروائی کے احکامات دیے، ہم نے چھاپے کے دوران گھر سے سامان اٹھایا۔
عدالتی استفسار پر تفتیشی افسر نے بتایا کہ ڈی آئی جی کراچی پولیس کی سربراہی میں کمیٹی متعلقہ ایس ایس پی کا بیان لے گی، مجسٹریٹ نے پوچھا کہ کیس پراپرٹی کا انداراج کس تھانے میں کیا گیا، جس پر تفتیشی افسر نے بتایا کہ ایف آئی آر درج ہونے سے پہلے ڈیفنس تھانہ کے ایس ایچ او نے رقم مدعی کو واپس کردی تھی۔
مجسٹریٹ نے دریافت کیا کہ رقم کی واپسی کا کوئی اندراج ہی نہیں کیا گیا، مدعی کو کتنی رقم واپس کی گئی، تفتیشی پولیس افسر نے بتایا کہ ایک کروڑ 3 لاکھ 50 ہزار روپے واپس کیے گئے تھے۔
عدالتی استفسار پر تفتیشی افسر نے بتایا کہ ڈی ایس پی عمیر طارق بجاری کی مدد سے دو تین جگہوں پر چھاپے مارے ہیں اور مزید تفتیش کر رہے ہیں، کل عمران قریشی سے تفتیش کے بعد ہی ان تینوں ملزمان کو گرفتار کیا۔
عمیر بجاری کے وکیل نے عدالت میں موقف اختیار کیا کہ عمران قریشی کی نشاندہی پر 3 ملزمان گرفتار کیے لیکن اسے کچھ نہیں کہا گیا، عدالتی استفسار پر تفتیشی افسر بتایا کہ وہ ملزمان کے بیانات سمیت تفتیش کی ڈائری اپنے ساتھ عدالت نہیں لائے ہیں۔
عدالت نے تفتیشی افسر سے ملزمان سے تفتیش سے متعلق ڈائری اور بیان طلب کرتے ہوئے آج ہی عدالت میں بیان اور ڈائری پیش کرنے کی ہدایت کردی۔ عدالت نے محفوظ حسن سمیت 3 ملزمان کو 26 نومبر تک جسمانی ریمانڈ پر پولیس کی تحویل میں دے دیا جبکہ ملزم ڈی ایس پی عمیر طارق بجاری کو عدالتی ریمانڈ پر جیل بھیج دیا۔
