سوات کے علاقے کالام میں سیاحوں سے بھری کوسٹر (وین) کھائی میں گرگئی، جس کے نتیجے میں 3 افراد جاں بحق اور 16 افراد زخمی ہوگئے، ریسکیو 1122 نے کارروائی کرتے ہوئے تمام زخمیوں کو اسپتال منتقل کر دیا۔
ریسکیو 1122 کے مطابق سوات کے سیاحتی مقام کالام کے قریب پیشمال میں سیاحوں کی گاڑی بے قابو ہو کر کھائی میں گر گئی، گاڑی میں 19 افراد سوار تھے۔
مزید پڑھیں
ریسکیو کی ٹیمیں جائے وقوعہ پہنچیں تو گاڑی میں سوار 16 افراد کو ریسکیو کیا گیا، ابتدائی طبی امداد کے بعد تمام زخمیوں کو اسپتال منتقل کر دیا گیا۔
ریسکیو کے مطابق حادثے کا شکار ہونے والی گاڑی میں 3 افراد موقع پر ہی جاں بحق ہو گئے تھے۔ جس کی لاشوں کو قریبی اسپتال منتقل کر دیا گیا۔
اسپتال انتظامیہ کے مطابق لائے گئے زخمیوں میں سے 4 کی حالت تشویشناک تھی جنہیں سیدو شریف اسپتال منتقل کر دیا گیا ہے۔