غزہ پر اسرائیل کے حملے کے بعد دنیا بھر میں مختلف ممالک خصوصاً مسلم ممالک میں عوامی سطح پر شدید غم و غصہ پایا جا رہا ہے، یہی وجہ ہے کہ پاکستان سمیت دنیا بھر میں اسرائیلی مصنوعات کا بائیکاٹ جاری ہے۔
سماجی رابطوں کی ویب سائٹس پر اکثر ایک بحث جاری رہتی ہے کہ کون کون سی مصنوعات اسرائیلی ہیں جن کا بائیکاٹ کرنا چاہیے، اس حوالے سے صارفین نے اپنی مدد آپ کے تحت ایک فہرست تیار کی ہے جس میں ایسی مصنوعات کا بتایا گیا ہے جو اسرائیل یا اس کے حامی ممالک کی تیار کردہ ہیں۔
گوگل پلے سٹور میں ایک ایپ کا اضافہ کیا گیا ہے جس سے آپ کو بہ آسانی پتا چل سکتا ہے کہ آپ جو چیز خرید رہے ہیں وہ اسرائیل یا ان کے حامی ممالک میں تیار کردہ ہے یا نہیں۔
‘نو تھینکس’ نامی ایپ گوگل پلے سٹور پر موجود ہے جس کو استعمال کرنے کا طریقہ انتہائی آسان ہے۔ ایپ ڈاون لوڈ کرنے کے بعد آپ نے مذکورہ پراڈکٹ کا کیو آر کوڈ اس ایپ میں اسکین کرنا ہے جس کے بعد وہ اس پراڈکٹ کی تمام تفصیلات آپ کو مہیا کردے گی۔
اس کے علاوہ آپ سیریل نمبر کے ذریعے بھی مصنوعات کی تفصیلات حاصل کر سکتے ہیں جس کے لیے آپ کو سرچ بار میں اس پراڈکٹ کا سیریل نمبر لکھنا ہوگا۔
گوگل پلے سٹور پر اب تک کی سب سے بہترین ایپلیکیشن !
جہاں آسانی سے آپ کو پراڈکٹ کا پتہ لگ جاتا ہے۔ ابھی ڈاؤن لوڈ کریں اور بار کوڈ یا QR کوڈ سکین کرے۔ اور اسرائیلی مصنوعات کا بائیکاٹ کریں۔ Apps کا لنک کمینٹ میں دیا گیا ہے۔ ڈاؤنلوڈ کریں۔ جزاک اللہ خیرا کثیرا #Boycott pic.twitter.com/A1AWs9IfR2— Ihsan Ullah Khan 🇵🇰 (@IamIhsanMarwat) November 27, 2023
ایپ بنانے والی کمپنی کا کہنا ہے کہ ظلم اور زیادتی کے خلاف آواز اٹھانے میں مدد کے لیے یہ ایپ بنائی گئی ہے اور پوری دنیا سے اس بائیکاٹ مہم میں حصہ لینے والوں کی آسانی کے لیے یہ ہماری ایک کاوش ہے۔
واضح رہے کہ ایک ہفتہ قبل لانچ ہونے والی اس ایپ کو ہزاروں افراد ڈاون لوڈ کر چکے ہیں۔
