نگراں وفاقی حکومت نے ڈیزل کی قیمت میں 7 روپے، لائٹ ڈیزل میں 4 روپے 52 پیسے کمی جب کہ پیٹرول کی قیمتیں برقرار رکھنے کا اعلان کیا ہے۔ نئی قیمتوں کا اطلاق رات 12 بجے کے بعد سے ہوگیا ہے۔
مزید پڑھیں
عالمی منڈی میں تیل کی قیمتوں میں حالیہ کمی اور امریکی ڈالر کے مقابلے میں پاکستانی کرنسی کی قدر میں اضافے کے باعث وفاقی حکومت نے پیٹرولیم مصنوعات میں کمی کر دی ہے۔
آئل اینڈ گیس ریگولیٹری اتھارٹی (اوگرا) کی جانب سے جاری نوٹیفکیشن کے مطابق نگراں وفاقی حکومت نے پیٹرول کی قیمت میں کوئی ردوبدل نہیں کیا جب کہ ڈیزل کی قیمت میں 7 روپے جب کہ لائٹ ڈیزل کی فی لیٹر قیمت میں 4 روپے 52 پیسے کمی کا اعلان کیا ہے۔
اسی طرح مٹی کے تیل کی قیمت میں 3 روپے 83 پیسے سستا کرنے کی منظوری دی گئی ہے ۔ ڈیزل کی نئی قیمت 289 روپے 71 پیسے فی لیٹر مقرر کر دی گئی ہے۔ جب کہ لائٹ ڈیزل کی قیمت 175 روپے 93 پیسے مقرر کر دی گئی ہے۔ اسی طرح مٹی کی نئی قیمت 201روپے 16 پیسے فی لیٹر مقرر کر دی گئی ہے۔
اس سے قبل 15 نومبر کو حکومت نے پیٹرول کی قیمت میں 2 روپے 4 پیسے کی کمی کی تھی جبکہ ہائی اسپیڈ ڈیزل 6 روپے 47 پیسے سستا کیا گیا تھا۔
15 نومبر کو قیمتوں میں کمی کے بعد پیٹرول کی نئی قیمت 281 روپے 34 پیسے مقرر کی گئی تھی جبکہ ڈیزل کی نئی قیمت 296 روپے 71 پیسے مقرر کی گئی تھی۔
اس کے علاوہ مٹی کے تیل کی قیمت میں 6 روپے 5 پیسے کی کمی کی گئی تھی جس کے بعد ایک لیٹر مٹی کے تیل کی قیمت 204 روپے 98 پیسے مقرر کر دی گئی تھی جبکہ لائٹ ڈیزل آئل 9 روپے ایک پیسے سستا ہو کر 180 روپے 45 پیسے فی لیٹر کردیا گیا تھا۔
