بھارتی کامیڈین کپل شرما اور سنیل گروور ماضی کی تمام رنجشیں بھلا کر ایک بار پھر سے چھوٹی اسکرین پر جلوہ گر ہونے والے ہیں۔ فوٹو اینڈ ویڈیو شیئرنگ ایپ انسٹاگرام پر نیٹ فلکس کی جانب سے مداحوں کو ایک بہت بڑی خوشخبری دی گئی ہے کہ کپل شرما سنیل گروور سمیت اپنی پوری ٹیم کے ہمراہ کامیڈی شوز کریں گے۔
نیٹ فلیکس کے مطابق امید کی جا رہی ہے کہ اس بڑے ورلڈ ٹور کے بعد سنیل گروور ایک مرتبہ پھر سے دی کپل شرما شو نظر آئیں گے۔ یاد رہے کہ کپل شرما اور سنیل گروور کی لڑائی 6 سال قبل ہوئی تھی جب آسٹریلیا سے واپسی پر نشے میں دھت کپل شرما نے اپنی دوستوں سے کہا تھا کہ مجھ سے پہلے آپ نے کیسے کھانا کھانا شروع کردیا۔ تم لوگوں کی اتنی ہمت، کیا تم جانتے نہیں کہ تم میری وجہ سے لاکھوں روپے کماتے ہو۔
مزید پڑھیں
یہ بات سننے کے بعد سنیل گروور، کپل شرما کو سمجھانے کے لیے آگے بڑھے تو کپل نے انہیں بھی گالیاں دی تھیں۔
سنیل گروور نے اس وقت تو چپ سادھے رکھی، تاہم ہندوستان پہنچتے ہی انہوں نے کپل شرما شو سے راہیں جدا کرلی تھیں جس کی وجہ سے چینل کو لاکھوں روپوں کا نقصان ہوا تھا۔
یہ بات بھی یاد رہے کہ سنیل گروور جن دوستوں کے لیے لڑے تھے، ان میں سے ایک کردار ’چندو‘ بھی کچھ عرصہ ناراضی کے بعد واپس لوٹ آیا تھا اور اب سنیل گروور خود بھی لوٹ آئے ہیں لیکن شو میں ’دادی‘ کا کردار ادا کرنے والے علی اصغر تاحال اپنے فیصلے پر قائم ہیں۔
