سپریم کورٹ کے جسٹس مظاہر اکبر نقوی نے چیف جسٹس قاضی فائز عیسٰی سمیت مقدمات کی تاریخ مقرر کرنے والی کمیٹی کے رکن ججز کو ایک اور خط لکھتے ہوئے کہا ہے کہ ان کی درخواستوں کا سماعت کے لیے مقرر نہ ہونا ان کے بنیادی اور آئینی حقوق کی خلاف ورزی ہے۔
جسٹس مظاہر علی اکبر نقوی نے اپنے خط میں کہا ہے کہ انہیں 29 اکتوبر کو شوکاز نوٹس موصول ہوا جس کے ابتدائی جواب میں انہوں نے جوڈیشل کونسل کے 3 ارکان پر اعتراض دائر کیا تھا، ان کا موقف ہے کہ انہیں سماعت کا نوٹس بغیر ایجنڈا بتائے جاری کیا گیا تھا۔
اپنے حالیہ خط میں جسٹس مظاہر اکبر نقوی کا کہنا ہے کہ انہوں نے اس معاملے پر 2 آئینی پٹیشنز دائر کی ہیں، درخواست سماعت کے لیے مقرر کرنا تو دور ابھی نمبر تک نہیں لگایا گیا، ان کا موقف ہے کہ درخواستیں سماعت کے لیے مقرر نہ کرنا قانون کی خلاف ورزی ہے۔
مزید پڑھیں
جسٹس مظاہر نقوی نے موقٖف اختیار کیا ہے کہ رجسٹرار کے پاس یہ اختیار نہیں ہے کہ وہ قابل سماعت ہونے کا معاملہ دیکھے، درخواستیں سماعت کے لیے مقرر نہ ہونا ان کے بنیادی اور آئینی حقوق کی خلاف ورزی ہے، رجسٹرار کو یہ اختیار نہیں کہ نوٹس میں پوچھے کہ وہ مقدمہ کی پیروی کرنا چاہتے ہیں یا نہیں۔
جسٹس مظاہر نقوی نے اپنے جواب میں کہا ہے کہ رجسٹرار کے نوٹس کی کوئی آئینی و قانونی حیثیت نہیں ہے، آئینی درخواستوں کو جلد مقرر کرنے کیلیے متفرق درخواست بھی دائر کی لیکن مقدمہ نہیں لگا، آئینی درخواستوں کی تاریخ مقرر نہ ہونا پریکٹس اینڈ پروسیجر قانون کی خلاف ورزی بھی ہے۔
