سپریم جوڈیشل کونسل نے سپریم کورٹ کے جسٹس مظاہر علی اکبر نقوی کے خلاف کارروائی کا فیصلہ کرتے ہوئے انہیں اظہار وجوہ کا نوٹس جاری کیا ہے اور ان سے 14 روز میں جواب طلب کر لیا ہے۔
سپریم جوڈیشل کونسل کے آج کے اجلاس کے بعد جاری اعلامیہ میں کہا گیا ہے کہ کونسل کو جسٹس مظاہر علی نقوی کے خلاف 10 شکایات موصول ہوئیں، کونسل نے 3 اور 2 کے تناسب سے جسٹس مظاہر نقوی کو اظہار وجوہ کا نوٹس جاری کیا۔
اعلامیہ میں بتایا گیا ہے کہ شوکاز نوٹس کے ساتھ جسٹس مظاہر نقوی کو شکایات کی نقول بھی بھیجی جائیں گی اور انہیں 14 دنوں میں شوکاز نوٹس کا جواب دینا ہے۔
جسٹس مظاہر نقوی کو شوکاز جاری کرنے سے اتفاق نہ کرنے والے اقلیتی ممبران کا مؤقف ہے کہ انہیں شکایات پر جائزہ کے لیے مزید وقت درکار ہے۔
مزید پڑھیں
سپریم جوڈیشل کونسل نے اعلامیہ میں من گھڑت شکایات بھیجنے والے وکلا کو انتباہ بھی جاری کیا ہے۔
سپریم جوڈیشل کونسل کا آخری اجلاس 12 جولائی 2021 کو سابق چیف جسٹس گلزار احمد کی سربراہی میں منعقد ہوا تھا، اس کے بعد سپریم جوڈیشل کونسل کو کئی شکایات موصول ہوئیں۔ اعلامیہ کے مطابق سپریم جوڈیشل کونسل نے 29 شکایات کا جائزہ لیا جن میں سے 19 شکایات مسترد کردی گئیں۔
ایک درخواست سپریم کورٹ کے جج جسٹس اعجازالاحسن کے خلاف دائر کی گئی تھی جو سپریم جوڈیشل کونسل کے ممبر بھی ہیں، اس کی شنوائی کے لئے جسٹس منصور علی شاہ بطور رکن سپریم جوڈیشل کونسل مقرر ہوئے اور جسٹس اعجاز الاحسن کے خلاف درخواست مسترد کر دی گئی۔
ایک درخواست آمنہ ملک کی جانب سے جسٹس سردار طارق مسعود کے خلاف دائر کی گئی تھی لیکن درخواست کے ساتھ مطلوبہ دستاویزات منسلک نہیں تھیں، سپریم جوڈیشل کونسل میں درخواست پر سماعت کے لئے جسٹس سردار طارق مسعود کی جانب سے معذرت کے بعد جسٹس منصور علی شاہ نے اس درخواست کی سماعت کی۔
سپریم جوڈیشل کونسل نے آمنہ ملک کو نوٹس جاری کرتے ہوئے مطلوبہ دستاویزات لف کر کے اگلی سماعت پر حاضر ہونے کا حکم جاری کیا ہے۔
کونسل اجلاس میں جائزہ لیا گیا کہ کیا کونسل کا الگ سیکریٹریٹ، سیکریٹری اور اسٹاف ہونا چاہیے، رجسٹرار سپریم کورٹ سپریم جوڈیشل کونسل کے الگ سے سیکریٹریٹ کے قیام سے متعلق ورکنگ پیپر چیف جسٹس کو پیش کریں۔
اعلامیہ میں کہا گیا ہے کہ قیاس آرائیوں سے بچنے اور شفافیت کو مدنظر رکھتے ہوئے سپریم جوڈیشل کونسل کی پوری کارروائی کی تفصیلات جاری کی جارہی ہیں۔
