ڈسٹرکٹ اینڈ سیشن کورٹ اسلام آباد نے سابق چیئرمین پی ٹی آئی عمران خان اور بشریٰ بی بی کے خلاف مبینہ غیر شرعی نکاح کے مقدمے میں سابق چیئرمین پی ٹی آئی کو آئندہ سماعت پر طلب کرلیا ہے۔
سینئر سول جج قدرت اللہ نے ایک صفحہ پر مشتمل سماعت کا تحریری حکمنامہ جاری کردیا۔ جس میں کہا گیا ہے کہ بشریٰ بی بی کی ایک روزہ حاضری سے استثنی منظور کیا جاتا ہے۔ حاضری کو یقینی بنانے کے لیے بشریٰ بی بی بطور ضمانت 50 ہزار روپے مالیت کے ذاتی مچلکے جمع کرائیں۔
مزید پڑھیں
حکمنامے میں مزید کہا گیا ہے کہ سابق چیئرمین پی ٹی آئی اڈیالہ جیل میں ہیں، سکائپ کے ذریعے ان کی حاضری تکنیکی وجوہات کی وجہ سے نہیں ہوسکی، جیل سپریٹنڈنٹ آئندہ سماعت پر سابق چیئرمین پی ٹی آئی کی حاضری کو یقینی بنائیں۔
عدالت نے کہا ہے کہ شکایت اور دیگر دستاویزات کی نقول فریقین کو فراہم کردی گئی ہیں۔ کیس کی آئندہ سماعت 18 دسمبر کو ہوگی۔
