دنیا بھر میں نئے سال کا رنگا رنگ آغاز، پاکستان میں پابندی کے باوجود ہوائی فائرنگ و آتش بازی

دنیا بھر سمیت پاکستان میں بھی نئے سال کا رنگ رنگ آغاز ہو گیا ہے اور پابندی کے باوجود رات کے 12 بجتے ہی ہوائی فائرنگ اور آتش بازی کا مظاہرہ کیا گیا ہے۔

نئے سال کا آغاز سب سے پہلے ٹونگا، سمووا اور کیریبانی میں پاکستانی وقت کے مطابق سہ پر 3 بجے ہوا اور وہاں لوگوں نے خوب جشن منایا۔

اس کے بعد نئے سال کا آغاز نیوزی لینڈ میں پاکستانی وقت کے مطابق سہ پہر 4 بجے ہوا اور لوگوں نے آتش بازی کا مظاہرہ کیا۔

اس کے بعد آسٹریلیا میں نئے سال 2024 کا آغاز اتوار کی شام 6 بجے ہوا۔ سڈنی میں لوگ نئے سال کو ویلکم کہنے کے لیے تیار تھے جنہوں نے خوب ہلا گلا کیا اور آتش بازی کا مظاہرہ کیا۔

آسٹریلیا کے بعد جاپان، کوریا، انڈونیشیا میں نیا سال شروع ہوا۔ جبکہ اب پاکستان میں بھی نئے سال کا آغاز ہو گیا ہے۔

واضح رہے کہ پاکستان نے فلسطین کے مظلوم عوام سے اظہار یکجہتی کی خاطر سال نو کی تقریبات پر پابندی کا اعلان کیا ہے۔

اس کے علاوہ شارجہ کی حکومت نے بھی اہل غزہ سے یکجہتی کا اظہار کرتے ہوئے سال نو کی تقریبات پر پابندی عائد کی ہے۔