نگراں وفاقی وزیر آئی ٹی و ٹیلی کمیونیکیشن ڈاکٹر عمر سیف سے پاکستان میں متحدہ عرب امارات کے سفیر حماد عبید ابراہیم الزابی نے منگل کو ان کے دفتر میں ملاقات کی جس کے دوران باہمی دلچسپی کے امور اور آئی ٹی و ٹیلی سیکٹر کے حوالے سے گفتگو ہوئی۔
ڈاکٹر عمر سیف نے کہا کہ پاکستان متحدہ عرب امارات کے ساتھ تعلقات کو قدر کی نگاہ سے دیکھتا ہے اور چاہتا ہے کہ اس کے اور متحدہ عرب امارات کے مابین آئی ٹی کے میدان میں تعلقات مزید مستحکم ہوں۔
انہوں نے کہا کہ حکومت آئی ٹی برآمدات کے اضافے کے لیے بھرپور اقدامات کر رہی ہے اور متحدہ عرب امارات پاکستانی آئی ٹی کمپنیوں کے لیے پرکشش مارکیٹ ہے۔ انہوں نے مزید کہا کہ یو اے ای کے ساتھ ڈیجیٹل گورنمنٹ ایکسپیرنس ایکسچینج پروگرام کے لیے معاہدہ کریں گے۔
دریں اثناء پاکستان میں تعینات برطانوی ہائی کمشنر جین میریٹ نے بھی ڈاکٹر عمر سیف سے ملاقات کی۔
ملاقات میں پاکستانی آئی ٹی انڈسٹری اور اسٹارٹ اپس کے حوالے سے گفتگو ہوئی۔ ڈاکٹر عمر سیف نے کہا کہ پاکستان کی آئی ٹی انڈسٹری میں بڑا پوٹینشل ہے اور یہ آئی ٹی کمپنیوں کے لیے برطانیہ میں کاروبار کے حوالے سے آسانی و وسعت کا خواہاں ہے۔ انہوں نے مزید کہا کہ برطانوی وینچر کیپیٹلسٹ پاکستانی اسٹارٹ آپس میں سرمایہ کاری کریں۔
