لاہور کے علاقے اچھرہ میں بابا اعظم چوک کے قریب ایک گھر میں آتشزدگی کے حادثے میں 4 بہن بھائی ہلاک ہوگئے ہیں۔
ابتدائی اطلاعات کے مطابق آگ کمرے میں موجود جلتے ہوئے چولہے سے لگی، جس نے ایک ہی کمرے میں رہنے والے پورے خاندان کو اپنی لپیٹ میں لے لیا، مذکورہ خاندان اس اکلوتے کمرے میں ہی باورچی خانہ بھی رکھتا تھا۔
جھلس کر ہلاک ہونیوالوں 4 بہن بھائیوں کی شناخت 12 سالہ ایمان فاطمہ، 8 سالہ نور فاطمہ، 5 سالہ ابراہیم اور 2 سالہ اسماعیل کے نام سے ہوئی ہے۔
پولیس کی ابتدائی تفتیش کے مطابق خاتون خانہ واش روم جاتے ہوئے کمرے میں موجود چولہا جلتا ہوا چھوڑ گئیں، جس کے باعث کپڑے کے ایک ٹکڑے میں آگ لگ گئی، جس نے تیزی سے کمرے کو اپنی لپیٹ میں لے لیا، کمرے کے ایک طرف فائبر گلاس کی دیوار بھی جل گئی، جس سے بچوں کے لیے بروقت امدادی کارروائیوں میں رکاوٹ پیدا ہوئی۔
وزیراعلیٰ پنجاب محسن نقوی نے آتشزدگی کے اس جان لیوا واقعہ پر گہرے افسوس کا اظہار کرتے ہوئے معصوم جانوں کے ضیاع پر غمزدہ خاندان سے اظہار تعزیت کیا ہے، انہوں نے آتشزدگی کے اس واقعہ کی تحقیقات کا حکم بھی دے دیا ہے۔
