پاکستان تحریک انصاف کے بانی عمران خان نے دی اکانومسٹ میں شائع ہونے والے آرٹیکل کی تصدیق کرتے ہوئے کہا ہے کہ مضمون میں جو باتیں لکھی گئی ہیں وہ درست ہیں، میں نے زبانی ہدایات دی تھیں جس کے بعد آرٹیکل لکھا گیا۔
کمرہ عدالت میں صحافیوں سے غیررسمی گفتگو کرتے ہوئے انہوں نے کہاکہ آئندہ ہفتے میری ایک تقریر بھی سوشل میڈیا پر آجائے گی، آج کل آرٹیفیشل انٹیلی جنس کا زمانہ ہے۔
مزید پڑھیں
واضح رہے کہ چند روز قبل عمران خان کا عالمی جریدے دی اکانومسٹ میں ایک مضمون شائع ہوا تھا جس میں عمران خان نے 8 فروری کو پاکستان میں ہونے والے عام انتخابات کو ڈھونگ قرار دیتے ہوئے کہا تھا کہ ملک میں الیکشن ہوں یا نہ ہوں مگر جس طریقے سے انہیں اور ان کی پارٹی کو عدم اعتماد کے ذریعے نشانہ بنایا گیا، اس سے ایک چیز واضح ہو گئی ہے کہ اسٹیبلشمنٹ، سیکیورٹی ایجنسیاں اور سول بیوروکریسی پی ٹی آئی کو لیول پلیئنگ فیلڈ دینے کے لیے تیار نہیں ہیں۔
9 مئی کو ہمارے خلاف سازش کی گئی
عمران خان نے کہاکہ 9 مئی کو ہمارے خلاف سازش کی گئی۔ کور کمانڈر ہاؤس لاہور، جی ایچ کیو اور ہائیکورٹ کی دائری برانچ جہاں سے مجھے گرفتار کیا گیا تھا ان جگہوں کی 9 مئی کی سی سی ٹی وی فوٹیج کس نے چوری کیں؟۔
انہوں نے کہاکہ پتا کرالیں، جنہوں نے ان 3 جگہوں کی سی سی ٹی وی فوٹیج چوری کیں، انہوں نے ہی 9 مئی کرایا ہے۔
انہوں نے کہاکہ انتخابات ہر صورت میں ہونے چاہییں، یہ ملکی معیشت اور سیاسی استحکام کے لیے انتہائی ضروری ہیں۔
عمران خان کا کہنا تھا کہ ہمارے لیے الیکشن لڑنا مشکل بنا دیا گیا مگر اس کے باوجود ملک میں انتخابات ہونے چاہییں۔
