لاہور زمان پارک میں پریس کانفرنس کرنے اور ریاستی اداروں کے خلاف بیانات دینے پر تحریک انصاف کے رہنماؤں فواد چوہدری اور شاہ محمود قریشی کے خلاف مقدمہ درج کر لیا گیا ہے۔
میڈیا رپورٹس کے مطابق وائس چیئرمین تحریک انصاف شاہ محمود قریشی اور رہنما پی ٹی آئی فواد چودھری کے خلاف سب انسپکٹر محمد وسیم کی مدعیت میں تھانہ ریس کورس لاہور میں مقدمہ نمبر 373 درج ہوا۔
مقدمہ میں سڑک بلاک کرنے ، ریاستی اداروں کو دھمکیاں دینے اور اشتعال انگیز تقاریر سمیت دیگر دفعات شامل کی گئی ہیں۔
ایف آئی آر کے متن کے مطابق شاہ محمود قریشی اور فواد چوہدری نے زمان پارک میں پریس کانفرنس کی ، پریس کانفرس کے رش کے باعث کینال روڈ بلاک ہوگئی۔
ایف آئی آر میں کہا گیا ہے کہ فواد چوہدری نے فتنہ انگیز اور اشتعال انگیز تقریر کی۔ فواد چوہدری نے عوام کو حکومت پاکستان کے ریاستی اداروں کے خلاف اکسایا، ریاستی اداروں پر قتل کی منصوبہ بندی کا بھی الزام لگایا۔
درج ایف آئی آر میں مزید کہا گیا ہے کہ فواد چوہدری نے شارع عام پر آمدورفت میں خلل ڈال کر جرم کا ارتکاب کیا۔
واضح رہے کہ گزشتہ روز چیئرمین تحریک انصاف عمران خان پر بھی دو مقدمات درج کیے گئے تھے جس کے بعد عمران خان پر قائم کیے گئے مقدمات کی تعداد 76 ہو گئی ہے۔
یہ بھی پڑھیے
