احتساب عدالت: فرح گوگی، شہزاد اکبر، ملک ریاض اور زلفی بخاری کے اثاثے اور بینک اکاؤنٹس منجمد کرنے کا حکم

190 ملین پاؤنڈ کیس میں اہم پیش رفت۔ احتساب عدالت کے جج محمد بشیر نے فرح گوگی، شہزاد اکبر، ملک ریاض اور زلفی بخاری کے تمام اثاثے اور بینک اکاؤنٹس منجمد کرنے کا حکم دیدیا۔

جج محمد بشیر کی عدالت سے جاری حکم میں کہا گیا ہے کہ وکیل ضیا المصطفی نسیم و دیگر ملزمان کے بھی تمام اثاثے اور بینک اکاؤنٹس منجمد کیے جائیں۔ عدالت نے ملزمان کے نام رجسٹرڈ گاڑیاں بھی ضبط کرنے کا حکم دیا ہے۔ عدالت نے اشتہاری قرار دیے جانے کے بعد تمام ملزمان کے دائمی وارنٹ گرفتاری بھی جاری کر دیے ہیں۔

گزشتہ سماعت کا احوال:

6 جنوری 2024 کو اسلام آباد کی احتساب عدالت کے جج محمد بشیر نے 190 ملین پاؤنڈ اسکینڈل ریفرنس میں شہزاد اکبر سمیت 6 ملزمان کو عدالتی مفرور قرار دے دیا تھا۔

احتساب عدالت نے توشہ خانہ اور 190 ملین پاؤنڈ اسکینڈل ریفرنس کیسز کی سماعت اڈیالہ جیل میں کی تھی۔ ڈپٹی پراسیکیوٹر جنرل نیب سردار مظفر عباسی، پراسیکیوٹر عرفان احمد بھولا، سہیل عارف اور تفتیشی ٹیم جبکہ وکلا صفائی کی جانب سے سردار لطیف کھوسہ، شعیب شاہین، بیرسٹر عمیر نیازی اور دیگر عدالت میں پیش ہوئے تھے۔

دوران سماعت رہنما پی ٹی آئی بیرسٹر گوہر خان بھی کمرہ عدالت میں پہنچ گئے تھے۔ نیب کے تفتیشی افسر نے 190 ملین پاؤنڈ اسکینڈل ریفرنس میں 6 ملزمان کی جانب سے وارنٹ کی عدم تعمیل پر بیان ریکارڈ کرایا گیا تھا۔ عدالت نے فرح گوگی، مرزا شہزاد اکبر، ریاض ملک، علی ریاض ملک، ضیاء المصطفی نسیم اور زلفی بخاری کو عدالتی مفرور قرار دے دیا تھا۔

وکلاء صفائی اور پراسیکیوشن کی باہمی مشاورت کے بعد عدالت نے توشہ خانہ ریفرنس میں فرد جرم کی کارروائی سمیت 190 ملین پاؤنڈ اسکینڈل ریفرنس میں ملزمان کی درخواست ضمانتوں کی سماعت 8 جنوری تک ملتوی کردی تھی۔