راولپنڈی میں واقع اڈیالہ جیل میں القادر ٹرسٹ پراپرٹی 190 ملین پاؤنڈ اسکینڈل کیس میں احستاب عدالت اسلام آباد نے عمران خان کے مزید جسمانی ریمانڈ کی استدعا مسترد کردی، اس موقع پر جیل کے باہر شہریوں اور وکلا ء کے درمیان نعرے بازی بھی ہوئی ہے۔
القادر ٹرسٹ پراپرٹی 190 ملین پاؤنڈ کیس کی اڈیالہ جیل میں سماعت احتساب عدالت کے جج محمد بشیر نے کی۔ جیل میں قائم کمرہ عدالت میں سابق وزیر اعظم عمران خان، ان کی اہلیہ بشرٰی بی بی اور وکلاء موجود تھے۔
نیب پروسیکیوٹر کی سربراہی میں استغاثے کی 5 رکنی ٹیم کے علاوہ عمران خان کی بہنیں علیمہ خان، اور نورین خانم بھی کمرہ عدالت میں موجود تھیں۔
نیب حکام کی جانب سے عمران خان کے مزید ریمانڈ کی استدعا کی گئی تاہم عدالت نے مزید ریمانڈ کی استدعا مسترد کرتے ہوئے عمران خان کو جوڈیشل ریمانڈ پرجیل حکام کے حوالے کردیا۔
آج سماعت کے موقع پر اڈیالہ جیل کے باہر شہریوں اور وکلاء کے مابین شدید نعرے بازی کی گئی، شہریوں کی جانب سے عمران خان کیخلاف مبینہ غیر شرعی نکاح پر کارروائی کا مطالبہ کرتے ہوئے نعرے بلند ہوئے، جس پر وہاں موجود چند وکلاء نے عمران خان کے حق میں جوابی نعرے لگائے۔
جیل عملے نے احتجاج کرنے والے وکلاء اور شہریوں کو مرکزی گیٹ سے ہٹا دیا ، عملے کے مطابق جیل کے مرکزی گیٹ کے سامنے کسی کو احتجاج اور مظاہرے کی اجازت نہیں ہے۔
