الیکشن کمیشن آف پاکستان کے خلاف پی ٹی آئی کی توہین عدالت کی درخواست پر سماعت آج پشاور ہائیکورٹ میں ہوگی۔
پشاور ہائیکورٹ کے جسٹس شکیل احمد اور جسٹس وقار احمد پر مشتمل 2 رکنی بینچ الیکشن کمیشن کے خلاف تحریک انصاف کی توہین عدالت کی درخواست پر سماعت کرے گا۔
واضح رہے کہ 2 دن قبل پشاور ہائیکورٹ نے پاکستان پی ٹی آئی کے انٹرا پارٹی انتخابات کالعدم قرار دینے اور انتخابی نشان بلا واپس لینے سے متعلق الیکشن کمیشن کا فیصلہ کالعدم قرار دیا تھا۔
پشاور ہائیکورٹ نے فیصلے میں کہا تھا کہ الیکشن کمیشن کا فیصلہ غیرقانونی ہے، الیکشن کمیشن کے پاس فیصلے کا اختیار نہیں تھا، الیکشن کمیشن پی ٹی آئی کے انتخابی نشان بلے کا سرٹیفیکٹ ویب سائٹ پر جاری کرے، پی ٹی آئی بلے انتخابی نشان کی حقدار ہے۔
الیکشن کمیشن کی جانب سے سرٹیفکیٹ جاری نہ کرنے پر تحریک انصاف نے الیکشن کمیشن کے خلاف توہین عدالت کی درخواست دائر کی ہے۔
دوسری جانب الیکشن کمیشن نے پشاور ہائیکورٹ کے فیصلے کے خلاف سپریم کورٹ میں درخواست دائر کر رکھی ہے، جس پر سپریم کورٹ کورٹ کا 3رکنی بینچ آج سماعت کرے گا۔