آئی ایم ایف کی تمام شرائط پر پورا اتر رہے ہیں، نگران وفاقی وزیر خزانہ شمشاد اختر

نگران وفاقی وزیر خزانہ شمشاد اختر نے کہا ہے کہ آج کا دن پاکستان کے لیے انتہائی اہم ہے، نیشنل کریڈٹ گارنٹی کمپنی لمیٹڈ (این سی جی سی ایل) پروگرام کا آغاز میرے لیے قابل فخر ہے۔ عالمی مالیاتی ادارے (آئی ایم ایف) پروگرام کی تمام شرائط پر پورا اتر رہے ہیں۔

اسلام آباد میں منعقدہ تقریب میں وزارت خزانہ اور کارانداز پاکستان کے درمیان نیشنل کریڈٹ گارنٹی کمپنی لمیٹڈ (این سی جی سی ایل) کے قیام کی صورت میں پاکستان کی پہلی خصوصی کریڈٹ گارنٹی کمپنی متعارف کرادی گئی ہے۔

تقریب سے خطاب کرتے ہوئے وزارت خزانہ، محصولات و اقتصادی امور کی نگراں وفاقی وزیر ڈاکٹر شمشاد اختر کا کہنا تھا کہ این سی جی سی ایل پاکستان میں چھوٹے اور درمیانے درجے کے کاروباروں کی فنانسنگ میں مدد اور فنانس تک رسائی بڑھانے کے لیے خصوصی کریڈٹ گارنٹی کی سہولت دے گی۔ اس انقلابی اقدام کا مقصد چھوٹے کاروباروں کے لیے سرمایہ کاری کی راہ ہموار کرنا ہے۔

ڈاکٹر شمشاد اختر کا کہنا تھا کہ پاکستان میں چھوٹے اور درمیانے درجے کے کاروباروں کا مجموعی پرائیویٹ کریڈٹ 5.2 فیصد ہے۔ نیشنل کریڈٹ گارنٹی کمپنی لمیٹڈ (این سی جی سی ایل) پاکستان کے 15 لاکھ سے زائد ایس ایم ایز اور 3.7 ٹریلین روپے سے زائد مارکیٹ حجم کے لیے پراڈکٹس تیار کرے گی۔

ڈاکٹر شمشاد اختر کا کہنا تھا کہ این سی جی سی ایل مالیاتی اداروں کیساتھ مل کر مارکیٹ میں کریڈٹ کی دستیابی یقینی بنائے گی۔ پاکستان میں تعینات برطانوی ہائی کمشنر جین میریٹ نے تقریب سے خطاب کرتے ہوئے کہا کہ مالیاتی شمولیت کے پروگرام کے تحت اس کمپنی پر 6 ارب روپے کی ابتدائی سرمایہ کاری کی گئی ہے۔ تقریب میں برطانوی ہائی کمیشن، ایس ای سی پی، اسٹیٹ بینک اور وزارت خزانہ کے نمائندوں نے شرکت کی۔