جنوبی افریقہ کرکٹ بورڈ نے اسرائیلی حمایت پر انڈر 19 ورلڈکپ ٹیم کے کپتان ڈیوڈ ٹیگر کو کپتانی سے ہٹا دیا ہے۔ ڈیوڈ ٹیگر اکتوبر 2023 میں جیویش اچیور ایوارڈز میں رائزنگ اسٹار نامزد ہوئے تھے، جس کے بعد کرکٹر نے اپنا یہ ایوارڈ اسرائیل میں یہودی فوجیوں کے لیے وقف کیا تھا۔ اب انہوں نے اسرائیلی فوجیوں کی حمایت میں ٹوئٹ کی ہے جس کے بعد افریقی کرکٹ بورڈ نے ان کے خلاف سخت ایکشن لیا ہے۔
کرکٹ ساؤتھ افریقہ (CSA) نے گزشتہ روز باضابطہ طور پر ڈیوڈ ٹیگر کی برطرفی کا اعلان کیا ہے، جس میں ممکنہ احتجاج اور ٹورنامنٹ سے متعلق خطرات کے بارے میں خدشات کا حوالہ دیا گیا ہے۔ کہا کہ یہ فیصلہ غزہ میں اسرائیل کے اقدامات سے متعلق مظاہروں کے پیش نظر کیا گیا ہے، ڈیوڈ ٹیم میں بطور کھلاڑی شامل رہیں گے جبکہ انڈر 19 ٹیم کے کپتان کا فیصلہ بعد میں کیا جائے گا۔
مزید پڑھیں
غیر ملکی میڈیا رپورٹس کے مطابق جنوبی افریقہ میں 19 جنوری سے شروع ہونے والے انڈر 19 کے ورلڈکپ کے دوران مظاہروں کا بھی امکان ہے۔ کیونکہ جنوبی افریقہ نے عالمی عدالت انصاف میں فلسطین میں اسرائیلی جارحیت پر مقدمہ بھی دائر کر رکھا ہے۔
خیال رہے کہ انڈر 19 کرکٹ ورلڈ کپ 19 جنوری 2024 سے جنوبی افریقہ میں کھیلا جا رہا ہے، پاکستان انڈر 19 ٹیم گزشتہ روز جنوبی افریقہ کے لیے روانہ ہوئی تھی۔
