سابق وزیراعظم شہباز شریف نے ایران کی جانب سے پاکستان میں میزائل حملے پر اپنے ردعمل میں کہا ہے کہ وہ ایران کی جانب سے پاکستان کی خودمختاری کی خلاف ورزی پر حیران ہیں۔
سوشل میڈیا ایکس پر اپنے پیغام میں سابق وزیراعظم شہباز شریف نے کہا کہ ’میں ایران کی جانب سے پاکستانی خودمختاری کی خلاف ورزی پر حیران ہوں، یہ میزائل حملہ ہماری دوستی کی روح اور اچھی ہمسائیگی کے اصولوں کے خلاف ہے۔‘
شہباز شریف نے کہا کہ ایران کی جانب سے میزائل حملہ خاص طور پر دونوں ممالک کے درمیان تاریخی تعلقات کو نقصان پہنچا سکتا ہے، دونوں ممالک کے درمیان مخلصانہ بات چیت اور بامعنی تعاون وقت کی ضرورت ہے۔
I am shocked at the Iranian breach of Pakistani sovereignty. This missile attack is against spirit of our friendship and principles of good neighbourliness, especially as it undermines the historic relationship between our two countries. Sincere dialogue and meaningful…
— Shehbaz Sharif (@CMShehbaz) January 17, 2024
سابق وزیر اعظم نے ایران کے میزائل حملے سے جاں بحق ہونے والے بچوں کے خاندان سے اظہار تعزیت بھی کیا ہے۔
واضح رہے کہ منگل کی رات ایران نے پاکستانی حدود کی خلاف ورزی کرتے ہوئے بلوچستان کے علاقے پنجگور سے تقریباً 60 کلومیٹر دور تحصیل کلگ میں کوہ سبز نامی گاؤں کی ایک مسجد اور اس سے ملحقہ گھروں کو میزائل حملوں میں نشانہ بنایا گیا۔
ایران کی جانب سے اس حملے میں ادریس نامی شخص کی 2 بچیاں جاں بحق ہو گئیں، جن کی عمریں 8 اور 12 سال تھیں، جبکہ 3 بچے بری طرح زخمی ہوگئے۔
