قیمتوں میں ردوبدل، کون سی دوائیں کتنی سستی ہوئیں؟

پاکستان میں گزشتہ برس تاریخی معاشی بحران کی بناپر متعدد بار ادویات کی قیمتوں میں تقریبا 20 فیصد تک اضافہ کیا گیا تھا۔

یاد رہے کہ گزشتہ برس آخری بار اگست میں حکومت کی جانب سے انسانی جان بچانے والی 25 ادویات کی قیمتوں میں اضافہ کیا گیا تھا۔

ڈرگ ریگولیٹری اتھارٹی کی جانب سے جاری کردہ نوٹیفیکشن کے مطابق ان دواؤں میں بلڈ پریشر، خون کی شریانیں کھولنے والی گولیاں، مختلف بیماریوں کے انجیکشنز، انہیلر اور سیرپ وغیرہ بھی شامل تھے۔

مگر اس ہفتے کابینہ نے ادویات کی قیمتوں میں 55 سے 65 فیصد کی منظوری دے دی ہے اور یہ وہ ادویات ہیں جو آئی سی یو میں داخل مریضوں کے لیے استعمال ہوتی ہیں۔

وی نیوز کے استفسار پر ترجمان وزارت صحت ساجد حسین شاہ نے بتایا کہ کابینہ سے منظوری کے بعد نگراں وفاقی وزیر صحت کی ہدایت پر 4 ادویات کی قیمتوں میں کمی کردی گئی ہے۔

ساجد حسین شاہ نے کہا کہ ان ادویات میں کولسٹیمیٹیتھ سوڈیم، 1 ملین یونٹ انجکشن، 2 ملین یونٹ انجکشن اور 3 ملین انجکشن شامل ہیں اور یہ وہ تمام دوایاں ہیں جو آئی سی یو میں داخل مریضوں کے لیے استعمال ہوتی ہیں۔

انہوں نے بتایا کہ’ کولسٹیمیٹیتھ سوڈیم کی قیمت 55 سے 65 فیصد کم ہوئی، 1 ملین یونٹ انجکشن کی قیمت 2987 سےکم ہو کر 1036روپے، 2ملین یونٹ انجکشن کی قیمت 4564 سے کم ہو کر 1737 روپے اور 3 ملین یونٹ انجکشن کی قیمت 5855 سےکم ہوکر 2591 روپے ہوگئی ہے‘۔

ترجمان وزارت صحت کا کہنا تھا کہ نگراں وزیر صحت ندیم جان مشکل حالات کے درپیش چیلنجز کے باوجود عوام کو ریلیف دینے کے لیے پر عزم ہیں۔ انہوں نے کہا کہ دیگر اقدامات کے ساتھ جعلی اور ان رجسٹرڈ ادویات کے خلاف کریک ڈاؤن بھی جاری رہے گا۔