پاکستان نے ایران میں پاکستانی شہریوں کے قتل کی مذمت کرتے ہوئے کہا ہے کہ یہ ایک ہولناک واقعہ ہے، ایسے بزدلانہ حملے پاکستان کو دہشتگردی سے لڑنے کے عزم سے نہیں روک سکتے، واقعے کی تحقیقات اور گھناؤنے جرم میں ملوث افراد کا محاسبہ کرنے کی ضرورت ہے ۔
ترجمان ممتاز زہرا بلوچ نے ایران میں پاکستانی شہریوں کے قتل کے واقعہ کے حوالے سے میڈیا کی طرف سے اٹھائے گئے سوالات کے جواب میں کہا کہ ایران میں پاکستانی شہریوں کا قتل ایک ہولناک واقعہ ہے ، ایران میں پاکستانی شہریوں کے قتل کے واقعہ کے مذمت کرتے ہیں۔
مزید پڑھیں
انہوں نے کہاکہ ہم ایرانی حکام کے ساتھ رابطے میں ہیں جبکہ اس واقعے کی فوری تحقیقات اور اس گھناؤنے جرم میں ملوث افراد کا محاسبہ کرنے کی ضرورت پر زور دیا ہے۔
ترجمان نے کہاکہ زاہدان میں ہمارے قونصلر اسپتال جا رہے ہیں جہاں زخمیوں کا علاج کیا جارہا ہے ۔ قونصلر وہاں پہنچ کر مقامی حکام سے ملاقاتیں بھی کریں گے اور جرم کے مرتکب افراد کے خلاف سخت کارروائی کی فوری ضرورت پر زور دیں گے۔
ترجمان نے کہاکہ اس سنگین معاملے سے پوری طرح آگاہ اور تمام ضروری اقدامات اٹھا رہے ہیں، سفارتخانہ لاشوں کو جلد ازجلد وطن واپس لانے کی پوری کوشش کرے گا۔
انہوں نے کہاکہ ایسے بزدلانہ حملے پاکستان کو دہشتگردی سے لڑنے کے عزم سے نہیں روک سکتے۔
پاکستان اور ایران کے درمیان تعلقات خراب کرنے کی کوشش کی گئی، جلیل عباس جیلانی
اِدھر نگراں وزیر خارجہ جیل عباس جیلانی نے کہا ہے کہ ایران میں پاکستانی مزدوروں کا قتل پاکستان اور ایران کے تعلقات خراب کرنے کی کوشش ہے۔
اپنے ایک بیان میں انہوں نے کہاکہ پاکستان اور ایران کے درمیان تعلقات خراب کرنے کے لیے ہمارے مشترکہ دشمن نے یہ گھناؤنا کھیل کھیلا ہے۔
واضح رہے کہ ایران کے سرحدی شہر سراوان میں دہشتگردی ہوئی ہے جس کے نتیجے میں 9 پاکستانیوں کو قتل کر دیا گیا ہے۔
