الیکشن کمیشن کا نتائج کی ترسیل کے لیے الیکشن مینجمنٹ سسٹم (ای ایم ایس) کا تجربہ کامیاب رہا، الیکشن کمیشن آف پاکستان نے ای ایم ایس کے استعمال کی تجرباتی مشق کی جو کامیاب رہی، اور بتایا کہ اس کے مفید اور حوصلہ افزا نتائج سامنے آئے ہیں۔
الیکشن کمیشن کے جاری کردہ بیان کے مطابق ملک بھر میں 859 مقامات پر قائم ریٹرننگ افسران کے دفاتر اس تجرباتی مشق میں شریک ہوئے جس میں فائبر، ڈی ایس ایل کنیکٹویٹی، ای ایم ایس ایپ لاگ ان، استعمال اور نتائج کی ترسیل و تدوین کے مراحل کی مکمل مشق کی گئی۔ اس مشق کے ذریعے ای ایم ایس کے ذریعے کامیابی سے پریذائیڈنگ آفیسرز کی جانب سے نتائج کی ترسیل اور ریٹرننگ آفیسرز کی جانب سے نتائج کی تدوین مکمل کی گئی۔
مزید پڑھیں
چند مقامات پر رابطہ کی دشواری کے باعث کچھ پریذائیڈنگ آفیسرز کو نتائج کی ترسیل میں معمولی مسائل کا بھی سامنا ہوا جنہیں فوری دور کیا جا رہا ہے۔ دوسری طرف انتخابی فہرستوں سے بذریعہ ایس ایم ایس اپنے ووٹ کے بارے میں معلومات 29 جنوری سے حاصل کی جاسکیں گی۔
الیکشن کمیشن کے مطابق الیکشن والے دن ووٹرز کے لیے قومی شناختی کارڈ لانا لازم ہے، زائد المیعاد شناختی کارڈ یا ٹوکن کی رسید پر ووٹ ڈال سکتے ہیں۔ علاوہ ازیں لوڈ شیڈنگ کے باعث پولنگ کا عمل متاثر ہونے کے خدشہ پر الیکشن کمیشن نے واپڈا کو 8 فروری کو پولنگ کے دن لوڈ شیڈنگ نہ کرنے کی ہدایت کر دی۔ واپڈا حکام کو تحریری طور پر آگاہ کر دیا گیا کہ واپڈا ملک بھر میں اعلانیہ غیر اعلانیہ لوڈشیڈنگ سے گریزاں رہے۔
واضح رہے یہاں یہ امر قابل ذکر ہے کہ اگر کسی پریذائیڈنگ آفیسر کو اپنے موبائل فون کے ذریعے نتائج کی آر او تک ترسیل میں کوئی دشواری ہو تو وہ پریذائیڈنگ آفیسر انتخابی نتیجہ ذاتی طور پر آر او کے دفتر پہنچائے گا۔
