انسداد دہشت گردی عدالت لاہور نے 9 مئی کے 7 مقدمات میں سابق چیئرمین پی ٹی آئی عمران خان کی عبوری ضمانتوں پر سماعت 2 فروری تک ملتوی کردی ہے۔
سماعت شروع ہوئی تو عدالت نے حکم دیا کہ بانی پی ٹی آئی ویڈیو لنک کے ذریعے اپنی حاضری مکمل کروائے، عدالتی اسٹاف نے بتایا کہ جیل حکام کو اطلاع دے دی ہے وہ کچھ دیر میں بانی پی ٹی آئی کو ویڈیو لنک پر پیش کریں گے۔
مزید پڑھیں
بانی پی ٹی آئی کے وکیل بیرسٹر سلمان صفدر کے جونئیر وکیل نے عدالت کو بتایا کہ سینئیر کونسل سلمان صفدر اسلام آباد میں ہیں، 7 مقدمات میں 2 کی ضمانتوں پر بحث مکمل ہے، عدالت ان 2 مقدمات پر فیصلہ سنا دے باقی دلائل سینئیر وکیل دیں گے۔
پراسیکیوٹر عبدالجبار ڈوگر نے عدالت کو بتایا کہ 3 مقدمات کا چالان ایڈمن کورٹ کو مارک ہوچکا ہے، اب اس بات پر مختلف ججمنٹ بھی آ چکی ہے کہ ضمانتوں پر سماعت ایڈمن کورٹ کرے گی۔ اس حوالے سے پراسیکیوشن نے ہائیکورٹ میں متفرق درخواست دائر کی ہے، ہائیکورٹ سے متفرق درخواست کے فیصلے تک سماعت ملتوی کی جائے۔
عدالت نے کہا کہ دوسرے معزز جج تبدیل ہو چکے ہیں آپ تمام مقدمات میں دلائل دیں گے، کیا آپ کو گرفتاری مطلوب ہے یا نہیں، پراسیکیوشن نے کہا کہ ہمیں چئیرمین تحریک انصاف کی مختلف مقدمات میں گرفتاری درکار ہے۔ اسلام آباد میں دوسرے مقدمات کا ٹرائل چل رہا ہے۔
