قومی ٹیم کے سابق آلراؤنڈر عماد وسیم نے کہا کہ فٹنس انٹرنیشنل معیار کی ہے، کم بیک پر شاہین کے ساتھ بات نہیں ہوئی، لیکن انٹرنیشنل کرکٹ میں واپسی کا دروازہ کھلا رکھا ہے۔ حتمی طور پر تو کچھ نہیں کہہ سکتا لیکن اگر پاکستان کرکٹ کو اشد ضرورت ہوئی تو پھر غور کروں گا۔
پاکستان کرکٹ کی ویب سائٹ پر شائع کیے جانے والے انٹرویو میں عماد وسیم نے کہا کہ انٹرنیشنل کرکٹ سے ریٹائرمنٹ لینا میرا اپنا فیصلہ تھا، ساتھیوں سے مشورہ پہلے ہی کرلیا تھا، مستقبل میں کم بیک کے بارے میں ابھی کچھ نہیں کہہ سکتا تاہم کوئی نہیں جانتا کہ زندگی کہاں لے جاتی ہے، لیکن اگر پاکستان کرکٹ کو اشد ضرورت ہوئی تو پھر دیکھوں گا۔
مزید پڑھیں
انہوں نے کہا کہ دنیا بھر کی لیگز کا معیار انٹرنیشنل کرکٹ جیسا ہی ہوتا ہے، اگر کوئی بیٹنگ، 4 اوورز بولنگ اور فیلڈنگ کرسکتا ہے تو اس کا مطلب ہوا کہ فٹنس انٹرنیشنل معیار کی ہے، اگر نہ ہو تو لیگز والے کبھی نہ بلائیں۔
امریکا اور ویسٹ انڈیز کی اسپنرز کے لیے سازگار کنڈیشنز میں شیڈول ٹی 20ورلڈکپ 2024 کے لیے قومی اسکواڈ میں ممکنہ شمولیت کے سوال پر انہوں نے کہا کہ یہ اگر مگر کی بات ہے، جب کوئی حتمی فیصلہ ہوا تو وہ سب کے سامنے ہوگا، میں سوچ سمجھ کر کوئی قدم اٹھاؤں گا، اگر ایسا کوئی موقع نہیں بنتا تو فی الحال میں جہاں ہوں وہیں خوش ہوں۔
ایک سوال پر عماد وسیم نے کہا کہ شاہین شاہ آفریدی اب پاکستانی ٹی20 ٹیم کے کپتان ہیں، میں ان کو پہلے بھی مشورے دیتا تھا، اب بھی دیتا ہوں کہ جو بھی کرنا ہو دل سے اور پاکستان کے لیے کرو، ان کے ارد گرد موجود لوگ بھی انہیں اچھے مشورے دے سکتے ہیں۔
انہوں نے کہا کہ ابھی ہم آئی ایل ٹی20 میں مصروف ہیں، میری کرکٹ میں واپسی کے حوالے سے کوئی بات نہیں ہوئی، ایسا ہو تو سب کو معلوم ہوہی جائے گا، ابھی ٹیم ڈائریکٹر محمد حفیظ سے بھی کوئی بات نہیں ہوئی، ریٹائرمنٹ سے قبل پی سی بی آفیشلز اور میں ایک ہی پیج پر تھے۔
