الیکشن کمیشن آف پاکستان اور وزارت داخلہ کے نوٹیفکشن کے مطابق پاک فوج اور سول آرمڈ فورسز کے دستے ووٹوں کی گنتی کا عمل مکمل ہونے تک آر اوز کے دفاتر کے باہر سیکیورٹی دینے کے پابند ہیں۔
حکام کے مطابق اس کا مقصد گنتی کے حساس عمل کے دوران سیکیورٹی کے کسی بھی نا خوشگوار واقعہ کو روکنا ہے۔
مزید پڑھیں
’سیکیورٹی کے لیے آرمی اور سول آرمڈ فورسز کے دستے آراوز کے دفاتر کے باہر تعینات ہیں اور الیکشن عمل کے ساتھ اُن کا کوئی تعلق نہیں۔ وہ صرف آراوز کے دفاتر کی بیرونی سیکیورٹی کے لیے تعینات ہیں‘۔
حکام نے بتایا ہے کہ صرف انتخابی عملہ آراوز کے دفاتر کے اندر ووٹ کاؤنٹنگ کا عمل جاری رکھے ہوئے ہے۔
حکام نے کہا ہے کہ عوام سے توقع کی جاتی ہے وہ اِس عمل کو پُرامن طریقے سے مکمل کرنے کے لیے آرمی اور سول آرمڈ فورسز کے ساتھ مکمل تعاون جاری رکھیں گے۔
واضح رہے کہ ملک میں 8 فروری کو ہونے والے عام انتخابات کے لیے پولنگ کا عمل مکمل ہوگیا ہے اور اب ووٹوں کی گنتی جاری ہے۔
