جماعت اسلامی پاکستان نے 25 فروری کو اسلام آباد میں جمہوریت کے بچاؤ کے لیے آل پارٹیز کانفرنس طلب کر لی۔
جماعت اسلامی کے زیراہتمام جمہوریت بچاؤ کانفرنس 25 فروری کو اسلام آباد میں منعقد ہوگی۔
کانفرنس کی صدارت امیر جماعت اسلامی سراج الحق کریں گے، جس میں تمام سیاسی جماعتوں کو باضابطہ مدعو کر لیا گیا ہے۔
مزید پڑھیں
امیر جماعت اسلامی سراج الحق نے کہاکہ 2024 کے انتخابات ملکی تاریخ کے آلودہ، بدنام اور متنازع ترین الیکشن تھے۔ ہم پی ٹی آئی سمیت تمام متاثرہ سیاسی جماعتوں سے رابطے کررہے ہیں۔
انہوں نے کہاکہ کمشنر راولپنڈی کے انکشافات ہمارے موقف کی تائید ہے، ایک کمشنر کی طرح مزید ضمیر جاگ گئے تو دھاندلی کرنے والے کدھرجائیں گے۔
سراج الحق نے مزید کہاکہ پاکستان میں الیکشن سے قبل ہی فیصلہ ہو جاتا ہے کہ کس کی حکومت بنے گی، کمشنر راولپنڈی تو دیگ کا ایک چاول ہے، اصل میں ساری دیگ ہی ایسی ہے۔
انہوں نے کہاکہ پاکستان ایسا ملک ہے جہاں انتخابات کے بعد انتشار بڑھ جاتا ہے حالانکہ دنیا بھر میں کہیں پر بھی ایسا نہیں، کیونکہ انتخابات کی صورت میں تو استحکام آتا ہے۔
امیر جماعت اسلامی کا مزید کہنا تھا کہ 1970 میں انتخابی نتائج کو تسلیم نہیں کیا گیا، پھر 1977 میں ہونے والے انتخابات میں دھاندلی کی گئی، اُس کے بعد پھر 11 سال کے لیے مارشل لا لگ گیا۔
انہوں نے کہاکہ ملک میں جس ماحول میں الیکشن ہوا ہے اس سے پولرائزیشن بڑھی، قوم کا جب نتائج پر اعتماد ہی نہ ہو تو پھر کوئی بھی حکومت مسلط کردیں وہ چل نہیں سکتی۔
