امریکی ریاست اوہائیو میں پولیس کو ایک ایسے مور کی تلاش ہے جو گھر سے فرار ہو کر اچانک غائب ہو گیا ہے، پولیس نے عوام سے اپیل کی ہے کہ وہ نیلے اور سبز پروں والے مور کی تلاش میں مدد فراہم کریں۔
اوہائیو کی ولوبی پولیس ڈپارٹمنٹ نےسماجی رابطے کی ویب سائٹ ’فیس بک ‘ پر اپنی ایک پوسٹ میں لکھا ہے کہ بیل روڈ اور لوسٹ نیشن روڈ کے قریب ایک شخص کے گھر سے 4 پالتو پرندے (مور) فرار ہو گئے ہیں۔
پولیس لیفٹیننٹ جان بیگووک نے بتایا کہ مور اس وقت فرار ہو گئے جب ان کے رہنے کا ڈربے کا دروازہ حادثاتی طور پر کھلا رہ گیا اور موقع پاتے ہی مور اپنے مالک کے گھر سے فرار ہونے میں کامیاب ہو گئے۔
جان بیگووک نے کہا کہ فرار ہونے والے 4 موروں میں سے 2 موروں کو بحفاظت پکڑ لیا گیا جب کہ تیسرے کو اسٹیٹ روٹ 2 پر ایک کار نے ٹکر مار دی ، چوتھا مور جس کا رنگ نیلا اور سبز ہے ، کا کوئی سراغ نہیں مل سکا اس لیے عوام سے اپیل کی جاتی ہے کہ وہ اس مور کی تلاش میں پولیس کی مدد کریں۔
