وفاقی وزیر اطلاعات مریم اورنگزیب نے کہا ہے کہ پاکستان مسلم لیگ (ن) کے قائد اور سابق وزیراعظم نواز شریف کسی بھی وقت پاکستان آ سکتے ہیں۔ ان کا کہنا تھا عمران خان اپنے سیاسی کاروبار کے لیے کتنی ماؤں کی گود اجاڑے گا؟ عمران خان نے ملکی معیشت کو تباہ کر دیا اور اب ملک کا امن و امان خراب کرنے پر تلے ہیں۔
لاہور میں نیوز کانفرنس کرتے ہوئے ان کا کہنا تھا عمران خان نے اقتدار کے خاتمے پر سائفر کا ڈرامہ رچایا جو خارجہ تعلقات پر اثر انداز ہوا۔ اب سائفر پر امریکا سے معافیاں مانگ رہا ہے۔
مریم اورنگزیب نے کہا عمران خان فراڈیا انسان ہے۔ تمہیں توشہ خانہ، ملک کے خلاف فارن فنڈنگ اور منی لانڈرنگ میں جواب دینا پڑے گا۔
وفاقی وزیر اطلاعات نے کہا عمران خان نے میڈیا کارکنوں پر بھی بد ترین تشدد کرایا اور لاشوں پر سیاست کی تاکہ افراتفری پھیلے۔ عمران خان کا ہر سیاسی تماشہ ناکام ہوا۔
مریم اورنگزیب کا کہنا تھا کہ لانگ مارچ، سائفر اور ’جیل بچو تحریک‘ کے بعد اب نعشوں پر سیاست کر رہا ہے۔ ظل شاہ کی نعش اسپتال پہنچانے والی گاڑی کے ڈرائیور کو زمان پارک کیوں بلایا۔ مرحوم کے والد کوپیسے کیوں دیئے۔ سب سوالوں کے جواب دینا ہوں گے۔
وزیراطلاعات نے کہا پی ٹی آئی کے وائس چیئرمین کی گاڑی ظل شاہ کے جاں بحق ہونے کے دوران استعمال ہوئی۔ عمران خان اپنے سیاسی کاروبار کے لیے کتنی ماؤں کی گود اجاڑے گا؟
