عالمی عدالت انصاف میں مقبوضہ فلسطینی علاقے میں اسرائیل کی پالیسیوں اور طرز عمل سے متعلق جاری مشاورتی کارروائی میں آج پاکستان اپنے قانونی دلائل پیش کرے گا۔
مزید پڑھیں
وزارت خارجہ کی ترجمان ممتاز زہرا بلوچ نے ایک بیان میں کہا ہے کہ مقبوضہ فلسطینی علاقے میں اسرائیلی طرز عمل سے پیدا ہونے والے نتائج پر عالمی عدالت انصاف کی مشاورتی کارروائی جاری ہے، یہ کارروائی اقوام متحدہ جنرل اسمبلی کی طرف سے عالمی عدالت سے مشاورتی رائے کے لیے کی گئی درخواست پر شروع ہوئی ہے۔
انہوں نے کہا کہ نگران وزیر قانون احمد عرفان اسلم آج عالمی عدالت انصاف میں پاکستان کا موقف پیش کریں گے، پاکستان کی جانب سے عالمی عدالت انصاف میں نہتے فلسطینیوں کے خلاف اسرائیل کے مظالم پر آواز اٹھائی جائے گی۔
عالمی عدالت انصاف میں پیر روز 3 گھنٹے تک جاری رہنے والے اجلاس کے دوران فلسطین کے 7 نمائندوں نے مغربی کنارے اور مشرقی یروشلم میں اسرائیل کے قبضہ کو غیر قانونی قرار دیا اور کہا کہ اسرائیل نے فلسطین میں نسلی امتیاز کا نظام نافذ کیا ہوا ہے اور فلسطینیوں کی نسل کشی میں مصروف ہے۔
منگل کو ہونے والی عدالتی کارروائی میں جنوبی افریقہ نے بھی فلسطینی مؤقف کی تائید کی اور اسرائیل کو نسل کشی کا ذمہ دار قرار دیا۔
اس معاملے پر اسرائیل کا مؤقف ہے کہ اقوام متحدہ کی جنرل اسمبلی کی طرف سے طلب کی گئی عالمی عدالت انصاف کی مشاورتی رائے غیرقانونی ہے کیونکہ اقوام متحدہ کی متعدد قراردادوں کے ساتھ ساتھ دو طرفہ اسرائیل فلسطینی معاہدوں نے یہ ثابت کیا ہے کہ تنازعہ کے حل کے لیے مناسب فریم ورک قانونی کے بجائے سیاسی ہونا چاہیے۔
واضح رہے کہ اقوام متحدہ کی جنرل اسمبلی نے 2022 میں عالمی عدالت انصاف سے 2 اہم سوالات پر رائے طلب کی تھی۔ اس حوالے سے عالمی عدالت انصاف میں 19 سے 26 فروری تک عوامی سماعتوں کا انعقاد کیا جا رہا ہے۔ عدالت ان دونوں سوالات پر اپنا فیصلہ ممکنہ طور پر رواں برس کے آخر تک سنائے گی۔
