وفاقی تحقیقاتی ادارے (ایف آئی اے) نے آسٹریلیا سے درآمد شدہ مضر صحت چنے کی کلیئرنس میں ملوث 3 افسران کو گرفتار کرلیا ہے۔
ترجمان ایف آئی اے کے مطابق، ڈائریکٹر کراچی زون ضعیم اقبال شیخ کی ہدایت پر آسٹریلوی درآمد شدہ چنے کی غیر قانونی کلئیرنس میں ملوث عناصر کے خلاف کریک ڈاؤن کیا گیا اور پلانٹ پروٹیکشن ڈیپارٹمنٹ کے 3 افسران کو گرفتار کر لیا گیا۔
مزید پڑھیں
ضامن انٹرپرائزز نامی درآمد کنندہ فرم نے دھوکہ دہی سے آسٹریلوی درآمد شدہ چنے کی غیر قانونی طریقے سے کلئیرنس کروائی تھی، ملزم نے پلانٹ پروٹیکشن ڈیپارٹمنٹ کے حکام کی ملی بھگت سے جعلی دستاویزات کی بنیاد پر مذکورہ کنسائنمنٹ کلیئر کرائی۔
پلانٹ پروٹیکشن ڈیپارٹمنٹ کے حکام نے کراچی پورٹ سے مذکورہ کنسائنمنٹ کی کلیئرنس کے لیے ریلیز آرڈر جاری کیا حالانکہ مذکورہ کنسائنمنٹ مکمل طور پر مضر صحت اور انسانی استعمال کے لیے انتہائی غیر موزوں تھی۔
مذکورہ کنسائنمنٹ کو پاکستان پلانٹ قرنطینہ رولز 2019 کے لازمی تقاضوں کی کھلم کھلا خلاف ورزی کرتے ہوئے کلیئر کیا گیا تھا۔ پلانٹ پروٹیکشن ڈیپارٹمنٹ کے ماہرین زراعت ولید مختار، شہزاد سلمان اور ڈائریکٹر قرنطینہ قاسم کاکڑ کو گرفتار کر لیا گیا ہے۔
ترجمان ایف آئی اے نے بتایا ہے کہ ملزمان کے خلاف مقدمہ درج کرکے تفتیش کا آغاز کر دیا گیا ہے جبکہ دیگر ملزمان کی گرفتاری کے لئے چھاپے مارے جا رہے ہیں۔
