نومنتخب وزیراعلیٰ سندھ مراد علی شاہ نے کہا ہے کہ 2024 کے انتخابات میں ہم نے کارکردگی دکھا دی ہے، آئندہ بلاول بھٹو کو وزیراعظم منتخب کروائیں گے۔
سندھ اسمبلی کے اجلاس میں خطاب کرتے ہوئے انہوں نے کہاکہ تیسری بار وزیراعلیٰ منتخب ہونا میرے لیے اعزاز کی بات ہے، عوام کی خدمت میں کوئی کوتاہی نہیں کروں گا۔
انہوں نے کہاکہ اپوزیشن مثبت سیاست کرے اور ہماری اصلاح کرے، کیونکہ اگر تنقید نہیں ہوگی تو ہم اپنی اصلاح کیسے کریں گے۔
مزید پڑھیں
مراد علی شاہ نے کہاکہ ہم ہمیشہ اپنے لوگوں میں موجود رہتے ہیں، اس لیے پیپلزپارٹی کو کامیابی ملی ہے، سیلاب متاثرین کے لیے ہم 21 لاکھ گھر بنا کر دے رہے ہیں۔
وزیراعلیٰ سندھ نے کہاکہ بلاول بھٹو کے دیے گئے 10 نکات پر عملدرآمد سے عوام کے مسائل حل ہوں گے۔
انہوں نے کہاکہ الیکشن کے حوالے سے خدشات ہمیں بھی ہیں لیکن قانونی راستہ اپنائیں گے، کیونکہ ہم اپنی کچھ سیٹوں کے لیے ملک کی سالمیت سے نہیں کھیلیں گے۔
’سب سے پہلے ملک کے استحکام کو دیکھنا ہے‘
مراد علی شاہ نے کہاکہ سب سے پہلے ملک کے استحکام کو دیکھنا ہے، ہم اس وقت آسان دور سے نہیں گزر رہے۔
انہوں نے کہاکہ دہشتگردی نے ایک بار پھر سر اٹھا لیا ہے، ہم نے اس کے خاتمے کے لیے کردار ادا کرنا ہے۔
انہوں نے کہاکہ پیپلزپارٹی کی قیادت نے ہمیشہ ملک کے لیے اپنی خدمات پیش کیں، ملک کو ایٹمی قوت بنانے میں ذوالفقار علی بھٹو اور بینظیر بھٹو کا کردار ہے اور یہ کریڈٹ ان سے کوئی نہیں چھین سکتا۔
وزیراعلیٰ سندھ نے کہاکہ آصف زرداری اگلے ماہ صدر مملکت کے عہدے کا حلف اٹھانے جا رہے ہیں۔
