خلیجی ممالک نے مسلمانوں اور کشمیریوں کے خلاف ہندوستانی پروپیگنڈے کو رد کردیا ہے۔ یہی وجہ ہے کہ خلیجی ممالک میں بالی وڈ فلمیں مسلسل پابندیوں کا شکار ہیں۔ حال ہی میں ہندوستانی فلم آرٹیکل 370 کو خلیجی ممالک میں ریلیز سے روک دیا گیا ہے۔
میڈیا رپورٹس کے مطابق خلیجی ممالک کی طرف سے فلم آرٹیکل 370 پر پابندی بالی ووڈ اور کشمیر میں حالات نارمل ہونے کے مودی کے بیانیے کے لیے ایک بڑا دھچکا ہے۔ بالی وڈ فلم آرٹیکل 370 میں کشمیریوں پر ہندوستانی مظالم کی غلط اور من گھڑت عکاسی کی گئی ہے۔ 23 فروری کو سینما گھروں میں ریلیز ہونے والی ہندوستانی فلم ’آرٹیکل 370‘ اپنی پروپیگنڈہ نوعیت کی وجہ سے بین الاقوامی سطح پر پاپندی کا شکار ہوئی۔
مزید پڑھیں
فلم کا مقصد اگست 2019 میں مودی سرکار کا اقوام متحدہ کی جانب سے مقبوضہ کشمیر میں آرٹیکل 370 کی غیر قانونی اور یکطرفہ منسوخی کا جواز پیش کرنا ہے۔ فلم آرٹیکل 370 بھی 2019 کے بعد سے کشمیر میں ہونے والے واقعات پر بنائی گئی ہے لیکن کشمیریوں کے حالات بالکل جھوٹ بتائے گئے ہیں۔
فلم ’آرٹیکل 370‘ تاریخی واقعات کو غلط انداز میں پیش کرتی ہے اور حقائق کو ایک خاص بیانیہ کے مطابق ڈھالتی ہے۔ اس سے پہلے بھی بالی وڈ فلم فائیٹر کو بھی خلیجی ممالک میں بین کیا گیا تھا۔ یہی نہیں ماضی میں ’دی کشمیر فائلز‘ جیسی متنازعہ فلموں کو بھی مسلم مخالف ایجنڈے کا پرچار کرنے پر بین الاقوامی فورمز پر ایسی ہی تنقید کا نشانہ بنایا گیا تھا۔فلم ’آرٹیکل 370‘ بھی ’دی کشمیر فائلز‘ جیسی ایک جانبدارانہ اور ایک طرفہ پروپیگنڈہ کہانی ہے۔
دی کشمیر فائلز پر سنگاپور اور یو اے ای نے پابندی لگا دی تھی
مودی سرکار کے زیر حکومت ہندوستان میں مسلمانوں خصوصاً کشمیریوں کے خلاف انتہا پسندی کی پوری دنیا گواہ ہے۔ مودی کی انتہا پسند سوچ اب بالی وڈ میں بھی اپنی جڑیں مضبوط کر چکی ہے۔ 2014 میں مودی کے حکومت میں آنے کے بعد اب تک 40 سے زائد مسلمان مخالف فلمیں ریلیز کی جاچکی ہیں۔ بالی وڈ کی پروپیگنڈہ فلموں کا زیادہ تر موضوع کشمیری ہیں۔
سنیما میں اس طرح کے بیانیے کشمیر اور ہندوستان بھر میں مسلمانوں کے خلاف حقیقی زندگی میں امتیازی سلوک اور تشدد کو بڑھاوا دیتے ہیں۔ بھارتی فلم انڈسٹری مسلمانوں کو دہشت گرد کے طور پر پیش کر تی ہے۔ بھارتی فلم انڈسٹری بھی کشمیر کے آزادی پسندوں کو عسکریت پسند اور دہشت گرد دکھاتی رہی ہے۔
بین الاقوامی امور کے ماہرین کا کہنا ہے کہ خلیجی ممالک کی طرف سے ریاستی سرپرستی میں دہشت گردی کے ذریعے کشمیر کو کنٹرول کرنے کی بھارتی کوششوں کو ناکام بنانا ایک قابل تعریف فیصلہ ہے۔
