پشاور زلمی کے کپتان بابر اعظم کے شدید ترین ناقد نیوزی لینڈ کے سابق کرکٹر اور کمنٹیٹر سائمن ڈول نے ان کے شان میں تعریفوں کے پُل باندھ دیے۔
سوشل میڈیا ویب سائٹ ایکس پر ایک ویڈیو وائرل ہورہی ہے جس میں کمنٹیٹر سائمن ڈول پریزنٹیشن کے دوران بابراعظم کی اسلام آباد یونائیٹڈ کیخلاف کھیلی گئی جارحانہ اننگز کی تعریف کرتے ان کی شاندار اننگز اور بہتر اسٹرائیک ریٹ کے ساتھ بیٹنگ کرنے پر انہیں سراہ رہے ہیں۔
NO WAY SIMON DOULL 😭😭😭 pic.twitter.com/CFzsyYjEOI
— عثمان (@usmssss) February 26, 2024
پشاور زلمی کے کپتان بابر اعظم نے اسلام آباد یونائیٹڈ کےخلاف 63 گیندوں پر 14 چوکوں اور 2 چھکوں کی مدد سے 111 رنز کی ناقابل شکست اننگز کھیلی تھی جبکہ اس دوران ان کا اسٹرائیک ریٹ 176 سے زائد کا رہا۔
یاد رہے کہ پی ایس ایل کے گزشتہ ایڈیشن میں کیوی کمنٹیٹر نے بابر پر تنقید کرتے ہوئے کہا تھا کہ وہ ٹیم کے بجائے اپنے ذاتی سنگ میل کے لیے کھیل رہے ہیں۔
واضح رہے کہ رواں ایڈیشن میں بابراعظم ٹی20 فارمیٹ میں تیزترین 10 ہزار رنز بنانے والے دنیا کے پہلے کرکٹر بنے، انہوں نے 271 اننگز میں یہ اعزاز حاصل کیا جبکہ کرس گیل کا ریکارڈ توڑا جنہوں نے 285 اننگز میں یہ کارنامہ سرانجام دیا تھا۔
بابر اعظم پی ایس ایل سیزن 9 میں بھی سب سے زیادہ رنز بنانے والے کھلاڑی ہیں، انہوں نے اب تک کے 5 میچوں میں 80 سے زائد کی اوسط سے 330 رنز بنارکھے ہیں۔
