گزشتہ 48 گھنٹوں کے دوران خیبرپختونخوا میں جاری بارشوں اور لینڈ سلائیڈنگ سے حادثات کے نتیجے میں ابتک 21 افراد جاں بحق جبکہ 37 افراد زخمی ہوئے ہیں۔97 گھروں کو جزوی جبکہ 30 گھروں کو مکمل نقصان پہنچا ہے۔
پی ڈی ایم اے کے مطابق وزیراعلیٰ خیبرپختونخوا علی امین خان گنڈا پور نے متاثرہ افراد کو فوری طور پر ریلیف مہیا کرنے اور جاں بحق افراد کے ورثا اور زخمیوں کو فوری طور پر امدادی چیکس مہیا کرنے کی ہدایت کی ہے۔
مزید پڑھیں
وزیراعلیٰ نے کہا ہے کہ بند راستوں کو کھولنے کے لیے فوری اقدامات کیے جائیں۔ عوام کو بروقت ریلیف پہچانے کے لیے تمام تر وسائل بروئے کار لائے جائیں۔ تمام متعلقہ ادارے، پی ڈی ایم اے، ضلعی انتظامیہ، ریسکیو 1122 کو مکمل الرٹ رہنے کی ہدایات کی گئی ہے۔
پی ڈی ایم اے کے مطابق متاثرہ اضلاع میں امدادی کارروائیاں جاری ہیں۔ مالم جبہ میں شدید برفباری سے محصور 6 سیاحوں کو ریسکیو کر لیا گیا۔ پی ڈی ایم اے تمام اضلاع کے ساتھ قریبی رابطے میں ہے۔ پی ڈی ایم اے نے تمام اضلاع کی ضلعی انتظامیہ کو پیشگی اقدامات کے لیے 25 فروری کو مراسلہ جاری کیا تھا۔
