قانونی ترمیم کا معاملہ: ایم کیو ایم اور مسلم لیگ ن کا معاہدہ سمجھ سے بالاتر ہے، وزیراعلیٰ سندھ

وزیراعلیٰ سندھ سید مراد علی شاہ نے کہا ہے کہ سندھ میں بااختیار بلدیاتی حکومتیں موجود ہیں، بلدیاتی حکومتوں کے نظام میں مزید بہتری کے لیے تیار ہیں، ہمارے میئرز اپنے اپنے شہروں میں کام کررہے ہیں، بلدیاتی حکومتوں کو مؤثر بنانے کے لیے ترامیم کی ہیں، اس حوالے سے ایم کیو ایم اور مسلم لیگ ن کا معاہدہ سمجھ سے بالاتر ہے۔

کراچی میں میڈیا سے گفتگو کرتے ہوئے مراد علی شاہ نے کہا کہ سندھ اسمبلی میں مسلم لیگ ن کا کوئی رکن موجود نہیں اور پنجاب میں تو مقامی حکومت ہی نہیں ہے۔ ہو سکتا ہے کہ ایم کیو ایم اور مسلم لیگ ن کا معاہدہ پنجاب کے تناظر میں کیا گیا ہو۔ اگر مقامی حکومتوں میں بہتری کی گنجائش ہے تو وہ سندھ اسمبلی کرے گی۔

وزیراعلیٰ مراد علی شاہ نے کہا ہے کہ ہماری سینیٹ کی 2 نشستیں خالی ہوئی ہیں، پیپلزپارٹی سینیٹ کی دونوں نشستیں جیتے گی اور آصف زرداری بھی صدر مملکت کا الیکشن جیت جائیں گے۔ پیپلز پارٹی نے جام سیف اللہ دھاریجو اور اسلم ابڑو کو نامزد کیا ہے۔ جام سیف اللہ دھاریجو رکن صوبائی اور قومی اسمبلی رہ چکے ہیں۔

ان کا کہنا تھا کہ دو تہائی اکثریت ملنے کے بعد ہماری ذمہ داری مزید بڑھ گئی ہے، صوبے کے عوام کی بہتری کے لیے تمام وسائل بروئے کار لائیں گے، صوبے کی بہتری کے لیے تمام جماعتوں سے بات کریں گے۔ سندھ کابینہ کی تشکیل کے حوالے سے پوچھے گئے سوال پر ان کا کہنا تھا کہ پارٹی قیادت سے صلاح مشورے کے بعد کابینہ تشکیل دیں گے۔