رمضان سے پہلے کن کن اشیا کی قیمتوں میں کمی ہوئی؟

رمضان سے قبل جہاں اشیائے خورونوش سمیت بہت سی دیگر اشیا کی قیمتوں میں اضافہ ہوا ہے، وہیں قیمتوں میں کمی بھی آئی ہے۔

کونسی اشیا کتنے روپے سستی ہوئیں؟

اسلام آباد کے علاقے آئی ایٹ میں پاکیزہ کیش اینڈ کیری کے مالک عامر سردار جو گزشتہ 5 برس سے یہ کاروبار چلا رہے ہیں، نے وی نیوز سے گفتگو کرتے ہوئے کہا کہ اس میں کوئی شک نہیں ہے کہ رمضان کی آمد سے قبل بہت سی چیزوں کی قیمتوں میں اضافہ ہوا ہے، لیکن اس کے ساتھ کچھ اشیاء کی قیمتوں میں کمی بھی ہوئی ہے۔

انہوں نے بتایا کہ جن اشیاء کی قیمتوں میں کمی ہوئی ہے ان میں انڈے سر فہرست ہیں، جن کی قیمت گزشتہ ماہ تک 400 روپے تک بھی رہی، لیکن اب درجن انڈوں کی قیمت 230 روپے تک ہے۔

قبل چینی 200 روپے تک فروخت ہوتی رہی ہے جب کہ اس وقت چینی کا ریٹ 147 روپے ہے، اسی طرح اچھا بیسن 300 روپے کلو فروخت ہو رہا تھا مگر اس وقت بیسن کی قیمت 260 روپے تک پہنچ گئی ہے، جبکہ نارمل کوالٹی کے بیسن کی قیمت 230 روپے ہے۔ انہوں نے مزید بتایا کہ آٹے کا ریٹ فی الحال مستحکم ہی ہے، نہ ہی ریٹ کم ہوا ہے اور نہ ہی بڑھا ہے۔

کوکنگ آئل کی قیمتوں کے حوالے سے بات کرتے ہوئے ان کا کہنا تھا کہ کوکنگ آئل کی قیمتیں کافی کم ہوئی ہیں۔ جو اچھے برینڈ کا کوکنگ آئل کا کارٹن 3500 تک فروخت کر رہے تھے، وہ اب تقریباً 2500 روپے تک فروخت کر رہے ہیں۔ اگر چاول کی بات کی جائے تو نیا چاول سستا ہوا ہے جبکہ پرانے چاول کی قیمت زیادہ ہے۔

یوٹیلیٹی اسٹورز پر کن اشیا پر سبسڈی دی جائے گی؟

یوٹیلیٹی اسٹورز کارپوریشن کے ایک اعلیٰ عہدیدار نے وی نیوز کو بتایا کہ رمضان ریلیف پیکیج کے تحت یوٹیلیٹی اسٹورز پر جن اشیائے خورونوش پر رعایت ہوگی، ان میں آٹا، چینی، گھی، آئل، چاول، دودھ، بیسن، دالیں، مصالحہ جات، کجھور اور دیگر اشیا شامل ہیں۔

انہوں نے بتایا کہ ان اشیا میں تقریباً سارا راشن اور ضروری اشیائے خورونوش شامل ہیں، جو رعایتی نرخوں پر یوٹیلیٹی اسٹورز پر دستیاب ہوں گی۔

کتنے فیصد سبسڈی دی گئی ہے؟

رمضان ریلیف پیکیج میں 45 ہزار ملین ٹن آٹا رعایتی نرخوں پر مختص کیا گیا ہے، جو بینظیر انکم اسپورٹ پروگرام کے اہل لوگوں کو دیا جائے گا۔ یعنی ایک اہل شخص کو ماہانہ 20 کلو آٹا سبسڈائز نرخوں پر دیا جائے گا ، اس طرح آٹے پر 77 روپے فی کلو سبسڈی دی جائے گی۔

اسی طرح چینی 35 ہزار ملین ٹن رعایتی نرخوں پر دی جائے گی۔ یعنی ماہانہ فی شخص 5 کلو چینی 46 روپے فی کلو سبسڈی کے ساتھ حاصل کر سکے گا۔

گھی 20 ہزار ملین ٹن مختص ہو گا، جس میں فی کلو پر 70 روپے سبسڈی دی جائے گی۔ جبکہ اسی طرح بیسن 2 ہزار ملین ٹن ہے جس میں فی کلو پر 50 روپے سبسڈی دی جائے گی۔

یوٹیلیٹی اسٹورز پر فی کلو کھجور پر 50 روپے، مشروبات (800 ملی لیٹر) اور ایک کلو دودھ پر 30 روپے، مصالحہ جات پر 10 فیصد، دالوں، آئل اور چاول پر 25 روپے سبسڈی دی جائے گی۔

سب سے زیادہ سبسڈی چائے کی پتی پر دی جائے گی۔ یعنی ایک کلو چائے کے پیکٹ پر 100 روپے کی سبسڈی دی جائے گی۔