اٹلی سے چلے پیزا کے ساتھ بالکل وہی سلوک ہو رہا ہے جو پاکستان میں غالب اور اقبالؒ کی شاعری کے ساتھ ہوا۔ کچھ بھی لکھ دو اور پہلی لائن کے آخر میں اقبال یا غالب کا اضافہ کر دو، بہترین شعر تیار ہے۔ پیزا بھی اسی صورتحال سے دوچار ہے، گول سا کچھ بھی بنا کر پنیر شامل کر دو، ‘لذیذ’ پیزا تیار ہے۔
انسٹا گرام پر ایک وائرل ویڈیو میں ایسا ہی ہوتا دکھایا گیا جس پر صارفین اور پیزا کے شوقین غصے اور ناراضگی کا اظہار کر رہے ہیں۔
ویڈیو میں گلاب جامن پیزا بناتے ہوئے دکھایا گیا ہے۔ شیف نہ صرف پیزا کی ٹاپنگ میں گلاب جامن کے چھوٹے چھوٹے ٹکڑے شامل کرتا ہے بلکہ آخر پر پیزے کے ہر تکونی ٹکڑے پر ایک بڑا سا گلاب جامن بھی رکھ دیتا ہے۔
https://www.instagram.com/p/C3622aCLOaE/?hl=en
2 ہفتے قبل اپ لوڈ ہونے والی اس ویڈیو کو اب تک لاکھوں صارفین دیکھ چکے ہیں جن میں سے اکثر نے شیف کو کڑی تنقید کا نشانہ بنایا ہے۔
ایک صارف نے کمنٹ کیا کہ ‘ذائقے کے لیے چوہے مار گولیاں بھی شامل کر لو’۔
ایک اور صارف نے کہا کہ خدا کرے کہ اس نوعیت کا یہ پہلا اور آخری پیزا ہو۔
ایک صارف کا کہنا تھا کہ پیزے کے ساتھ یہ سلوک ہوتا دیکھ کر اٹالین رو رہے ہوں گے۔
ایک صارف نے تو غصے میں شیف کے لیے سزائے موت تجویز کر دی۔
پیزے کے شوقین ایک صارف نے کہا کہ، ‘جہنم میں ایسے لوگوں کے لیے الگ سے جگہ تیار ہے’۔
صارفین کا ماننا تھا کہ گلاب جامن پیزا بنا کر پیزے اور گلاب جامن دونوں کے ساتھ زیادتی کی گئی ہے۔
واضح رہے کہ گلاب جامن پیزا بھارت کے کسی ریستوران نے شروع کیا ہے اور فی الحال شہر اور ریستوران کی لوکیشن سامنے نہیں لائی گئی۔
