سمندر میں لاپتہ ماہی گیروں کی تلاش کے لیے پاک بحریہ اور میری ٹائم سیکیورٹی ایجنسی نے آپریشن مکمل کر لیا ہے، آئی ایس پی آر کے مطابق اب تک 14 لاپتا ماہی گیروں کے جسد خاکی سمندر سے تلاش کر لیے گئے ہیں۔
سمندر میں لاپتہ ماہی گیروں کی تلاش کے لیے پاک بحریہ اور پاکستان میری ٹائم سیکیورٹی ایجنسی کی جانب سے لاپتہ ماہی گیروں کے لیے سرچ آپریشن میں اہم کامیابی حاصل ہوئی، پاک فوج کے شعبہ تعلقات عامہ (آئی ایس پی آر) کے مطابق 7 روز کی تلاش کے بعد پاک بحریہ اور میری ٹائم سکیورٹی ایجنسی کے عملے کو بحیرہ عرب میں ڈوبنے والے 14 ماہی گیروں کی لاشیں مل گئی ہیں۔
مزید پڑھیں
’لاشوں کو شناخت اور روانہ کرنے کے لیے ایدھی ایمبولینسز کے ذریعے متعلقہ حکام کے حوالے کر دیا گیا ہے‘۔
ترجمان پاکستان میری ٹائم سیکیورٹی ایجنسی کا کہنا ہے کہ 7 روز قبل ابراہیم حیدری سے شکار کے لیے گہرے سمندر میں جانے والی الاسد نامی کشتی تیز ہواؤں کے باعث الٹ گئی تھی، حادثے میں 35 ماہی گیر کھلے سمندر میں ڈوب گئے تھے جن میں سے 21 ماہی گیروں کو ریسکیو کر لیا گیا تھا۔
واضح رہے 14 ماہی گیر لاپتا ہوچکے تھے، جن میں سے تمام کو پاک بحریہ اور میری ٹائم سیکیورٹی ایجنسی نے آپریشن کے بعد نکال لیا، تمام لاپتہ ماہی گیروں کا تعلق کراچی سے تھا۔