کراچی پولیس نے خوف کی علامت سمجھا جانے والا بین الصوبائی ’بلیک کرولا گینگ ‘ کا ایک اہم کارندہ گرفتار کر لیا۔
مزید پڑھیں
تفصیلات کے مطابق، کراچی کی ڈسٹرکٹ ایسٹ سولجر بازار پولیس نے خفیہ اطلاع پر ایک بڑی کارروائی کرکے بلیک کرولا گروہ کے اہم رکن شہزاد علی کو گرفتار کیا۔
اس حوالے سے ایس ایس پی ایسٹ عرفان بہادر نے میڈیا کو بتایا کہ بلیک کرولا گروہ پاکستان بھر میں انٹرنیشنل برگر چینز میں لوٹ مار کرتا تھا، ملزم نے کراچی سے پنجاب تک برگر چین کی درجنوں وارداتوں کا انکشاف کیا۔
ایس ایس پی عرفان بہادر نے کہا کہ بلیک کورولا گروہ صرف کراچی میں ایک درجن سے زائد وارداتیں کرچکا ہے، ملزم شہزاد علی کو لولین روڈ گارڈن ویسٹ سے گرفتار کیا، ملزم اندرون سندھ میں بھی متعدد وارداتوں میں ملوث ومطلوب تھا۔
انہوں نے کہا کہ ملزم شہزاد پنجاب میں 35 سے زائد مرتبہ گرفتار ہوچکا ہے، ملزم سمیت اس گروہ کے کارندوں کی دوران ڈکیتی متعدد سی سی ٹی وی فوٹیجز موجود ہیں، گرفتار ملزم سے واردات کے پیسوں سے خریدی گئی کار بھی برآمد کی ہے۔
عرفان بہادر نے مزید بتا یا کہ ملزم کے دیگر 3 ساتھی گوجرانوالہ میں بند ہیں اور ایک ساتھی راشد تا حال فرار ہے۔ ایس ایس پی ایسٹ نے بتایا کہ ملزم نے اندرون سندھ، حیدرآباد اور پنجاب میں متعدد وارداتوں کا اعتراف کیا ہے، پولیس نے ملزم سے غیر قانونی اسلحہ بمعہ ایمونیشن بھی برآمد کیا ہے۔
